Ereñotzuko presa botatzeko eskaera luzatu diote, Kantauriko Konfederazio Hidrografikoari, Eguzki Talde Ekologistak eta Ríos con Vida elkarteak. Hala jakinarazi dute: «eskatu diogu bertan behera utzi dezala, Ereñotzuko zentral hidroelektrikoak Urumea ibaitik ura hartzeko daukan eskubidea; eta ondorioz, presa eraitsi dezala».
Izan ere, nabarmendu dute izokinari eta beste arrain espezieei, traba egiten diela: «kontuan izan behar da, presa hori Urumeako Kontserbazio Bereziko Eremuan bertan dagoela, Natura 2000 eremuan alegia; eta izokinari eta beste arrain espezieei traba haundia egiten diela», azaldu dute.
Eskaera egin dute, zehazki, ofizialki desagertu egin delako, eskubidea eskuratu zuen enpresa; Central Hidroeléctrica de Rentería izenekoa, Energiaren Euskal Erakundeak eta Oreretako Udalak osatutakoa. «Eta azkeneko hiru urteotan, behintzat, zentralak ez du funtzionatu», nabarmendu dute.
«Zentralak ez ditu bete, ezarritako baldintzak»
Era berean, adierazi dute zentralak ez dituela bete, eskubidea jaso zuenean ezarri zitzaizkion bi baldintzak: «bata, gutxienez 1.600 litro segunduko emari ekologikoa errespetatzea; eta bestea, izokin-eskala eraikitzea. Denborarekin agerian geratu da, zentralak sarri ez duela errespetatu gutxieneko emari ekologikoa, eta izokin-eskalak ez dituela baldintza minimoak betetzen. Foru Aldundiak Urumeako arrain-eskalen inguruan egindako txosten batek argi eta garbi esaten du, Ereñotzukoak ez diela izokinei behar bezala pasatzen uzten. Gainera, kontuan izanda non dagoen eskala, oso mantenu zailekoa da. Beraz, egitura akatsengatik batetik, eta mantenu zailtasunengatik bestetik, eskalak ez ditu baldintzak betetzen, eta Kontserbazio Bereziko Eremuaren helburuak ere urratzen ditu».
Hori horrela, nabarmendu dute, arrazoi horietako edozein «berez nahikoa» dela, eskubidea bertan behera uzteko, eta presa botatzeko: «Urumean bioaniztasuna sustatzeko aukera paregabea da, ezbairik gabe».
Azkenik, adierazi dute, ibaiak hobetzeko bidean, helburu nagusienetakoak direla ura hartzeko eskubideak bertan behera uztea, eta ibai barruko oztopoak kentzea; «are gehiago aspalditik funtziorik ez dutenean, eta oso oztopo garrantzitsuak direnean, kasu honetan bezala», diote.