Iruñako San Ferminak baino ordubete lehenago, goizeko 11:00ak direnean, botako dute aurreneko etxeferoa gaur, Martindegi auzoan, festei hasiera emateko. Zapi gorriak prest izango dituzte ordurako, eta lepoan jantzi eta berehala, kalejiran abiatuko dira denak, auzoan barrena. Horri, buruhaundiek eta haurren jolasek emango diote segida. Auzokoak bakarrik ez, ingurutik joandakoak ere arituko dira jolasean; eta horien artean, ziur ez dutela hutsik egingo, udara pasatzera Hernanira etorri diren haur sahararrek ere!
Haurrak batera eta bestera, jolasean... eta helduak hamaiketakoa egiten! Horrek ere ez baitu hutsik egiten, San Fermin jaien hasieran!
Marrazkiak, tiro lehiaketa, sagardoa eta tortillak
Bazkaltzeko tarte bat hartu ondoren, 17:00etan segiko dute festarekin, eta ohiko egitaraua izango du, aurreneko arratsaldeak ere. Errekaren alde batean, mahaiaren bueltan eseriko dira haurrak, kontzentratuta, marrazkiak egiten; eta beste aldean, tiro karabina lehiaketan ariko dira, ondo kontzentratuta horretan ere!
Geroago hartuko dute lasaitua, eta gozatua, puzgarriak jartzen dituztenean. Eta bien bitartean, helduak nor bere etxean, ahalik eta tortillarik goxoena prestatzen. 14 sagardotegitako sagardoarekin batera dastatuko dituzte 20:00etan, eta baita tortilla onena aukeratu ere. Saria izango du, gainera.
Eta bihar dagoeneko larunbata denez, etxeratzeko presarik ere ez dute izango. Bide Batez taldearekin erromeria luzatuko dira, beraz.
Herri kirol saio polita, igande goizean
Egitarau zabalarekin jarraituko dute San Ferminek, asteburuan ere. Bihar izango dira, auzo bazkaria, zezen txikiak eta zalditxoak, Laiotzekin bi dantzaldi, eta zaldi dema.
Eta igandean, bertso eta bertso artean, izango da herri kirol saio polita: biren kontra ariko da Aitzol Atutxa aizkolaria; Eneko Saralegi eta Unai Otaegiren kontra.
MARTINDEGIKO JAIAK
GAUR, ostirala
11:00, Festei hasiera emateko, auzoan zehar kalejira.
11:30, Haur jolasak eta buruhaundiak.
17:00, Denak marraztera.
17:00, 49. Tiro Karabina Lehiaketa.
18:30, Puzgarri bereziak.
19:00, Dastaketako tortillak jasotzea.
20:00, Sagardo dastaketa eta pintxoak, ondorengo sagardotegiekin: Zelaia, Oialume Zar, Oiarbide, Sarasola, Etxeberria, Larrarte, Gurutzeta, Petritegi, Larre Gain, Iretza, Artola, Elutxeta eta Indione.
Ondoren, Tortilla goxoaren emaitza, Akelenea jatetxeak sarituta.
22:30, Erromeria, Bide Batez taldearekin.
BIHAR, larunbata
10:30, Auzoko Hildakoen alde Meza. Ondoren, hamaiketakoa, Oialume tabernaren eskutik.
13:00, Goiko aristian, oroigarri xume bat gure artean ez daudenentzat. Tturko familiari eskertza, ematen diguten harreragatik.
14:30, Auzo bazkaria.
16:30, Gaztelu puzgarria.
18:00, Zezen txikiak eta zalditxoak.
19:30, Arratsaldeko dantzaldi saioa, Laiotz taldearekin.
23:00, XVII. Abere dema, Imanol Paolla eta Asteasuko Itxaso Arrutiren zaldein artean zaldien artean.
00:00, Dantzaldia, Laiotzekin.
Goizaldean, Platano dantza lehiaketa.
ETZI, igandea
12:00, Euskal Festa: Aizkolariak: Aitzol Atutxa batetik, eta Eneko Saralegi eta Unai Otaegi bikotea bestetik, lehian. Harrijasotzailea: Mikel Lopetegi ‘Urra’.
13:00, Bertsolarien saio berezia: Andoni Egaña eta Amets Arzallus.
18:00, XXII. Trikitilari Gaztetxoen Txapelketa.
18:00-19:00, Toka txapelketa nagusia (Gurutzeta sukaldeak antolatuta).
Jarraian, Bertsolarien bigarren saioa: Aitor Mendiluze eta Miren Amuriza.
20:00, Erromeria, Eider eta Lierni Tolosa ahizpekin.
Ondoren, Kalejira auzoan barrena, festei bukaera emateko.