Ez da posible izan. Hernaniko Maialen traineruak ezinezkoa du Euskotren Ligara sailkatzea atzo Portugaleten zortzigarren sailkatu eta gero. Lau traineruk bakarrik lortu dezakete Ligara sailkatzea eta ontzi asko daude, hamabi guztira, postu gutxi horien bila.
Faborito nagusiak ez zuten hutsik egin eta San Juan (11:06) eta Orio (11:10) sailkatu ziren lehendabiziko bi postuetan eta Hondarribia (11:17) eta Donosti Arraun Lagunarentzat (11:17) izan zen laugarren postua. Lau traineru hauek sailkapena ia ziurtatuta dute atzoko aldeak ikusita. Bosgarren Kaiku (11:37) sailkatu zen laugarren postutik 20 segundora. Hala ere puntuak hartzen dira kontutan eta oraindik borroka espero da.
Hernani (12:06) aldiz, hamargarren sailkatu zen eta aukera guztiak galdu ditu. Lehenengo postutik minutu batera geratu zen. Aurtengo denboraldia ez da erraza izango Hernanirentzat eta hori bazekiten hasi aurretik arraunlari eta entrenatzaileak.
Bi ontzi utzi zituzten atzetik; Lea Artibai (12:50), hamabigarren, eta Hibaika (12:18). Errenteriarrak ziaboga barrendik eman eta beren bidetik itzuli ziren buelta ongi emateko, denbora asko galduz maniobra horretan.
Donostiarra (11:42) sailkatu zen seigarren, Deusto (11:43) zazpigarren, Tolosaldea (11:50), zortzigarren, eta Cabo (11:57) bederatzigarren.
Hernaniren helburua aurtengo denboraldian estropadaz estropada hobetu eta esperientzia hartzea izango da. Taldea eraberritu egin du aurten eta sendotze bidean daude.
Zierbenan itsasoan da estropada
Eta hobetzen hasteko lehenengo aukera gaur izango dute, 11:45etatik aurrera Zierbenan. Ur geldoetatik itsasora pasako da estropada eta beste estropada mota ikusiko da, nahiz eta hau ere erlojuz aurka izan.