Aurtengo San Joan jaiak bukatu dira eta Udalaren behin-behineko «balorazioa baikorra da. Ehundik gora ekitaldi antolatu ditugu, Udalak eta herriko zenbait talde elkarlanean, eta orohar aurreikusita bezala joan dira. Eguraldiak lagundu digu eta dantza, musika, antzerkia, jolasak, kirolak... ekitaldi guztiak kalean giro ederrean gozatzeko aukera paregabea erraztu digu horrek».
Elkarlana ere azpimarratu du Udalak. «Eguraldiaz gain, udal langileen eta herriko talde, elkarte eta kolektiboen esfortzua, lana eta profesionaltasuna funtsezkoak izan dira ekitaldi guztiak behar bezala atera daitezen. Haiei esker hernaniar guztiok gozatu ahal izan dugu Sanjoanetan. Haiei esker gure sanjoanak jai parte-hartzaileak eta herrikoiak dira».
«Eraso sexistak arbuiatu eta salatzen ditugu»
Hala ere eraso sexistek festen beste aldea izan direla azpimarratzen dute Udaletik. «Giro alai hori ilundu duten hiru sexu erasoren berri izan dugu; emakumeen kontrako eraso horiek gogor arbuiatu eta salatu nahi ditugu. Sanjoanetan eta urte osoan, Hernanik planto egiten die eraso sexistei!».
Balorazio sakonagoa eta bateratua egiteko hitzordua ezarrita dago: bihar, astelehenean, 19:00etan, Biteri kultur etxean. Jai Batzordeko kide guztiok, baita herritarrak ere, gonbidatuta daude parte hartzera.