Udaleko Hirigintza sailak bultzatuta, Mugikortasun Astea antolatu da Astigarragan, irailaren 19tik 24rako tartean. Besteak beste, ibilaldi desberdinak, hitzaldiak eta pelikula emanaldiak antolatu dira, eta herritar guztiak daude parte hartzera gonbidatuta, ekitaldi guztiak irekiak izango baitira.
Tren berdean edo oinez, ibilaldiak
Astea hasteko, tren berdean ibilaldi bat egiteko aukera izango da. Irailaren 19an izango da hori. Joseba Barandiaranetik aterako da trena, arratsaldeko 17:00etan eta 18:00etan.
Hurrengo ibilaldi proposamena, berriz, irailaren 21erako egin da. Egun horretan, goizeko 11:00etan jarri dute zita Joseba Barandiaran plazan, eta bidegorrian barrena Martutenera joan-etorria egin ahal izango da. Bueltakoan, udaletxean jan-edana jarriko da, parte-hartzaileentzat.
Herbeheretako bizikletak protagonista, ‘Why we cycle’ pelikulan
Mugikortasunaren inguruan hausnartzeko pelikula bat ere ikusi ahal izango da irailaren 20an, arratsaldeko 19:00etan, kultur etxean: Why we cycle.
Bertan, txirrindulari eta zientzialariei egindako elkarrizketen bidez, Herbeheretako bizikletaren aldeko kulturaren berri ematen da, eta bizikletan ibiltzeak zoriontasuna eta osasun ona dakartzala defendatzen da. Herbeheretan gehiago omen dira bizikletak biztanleak baino, eta mugitzeko erabiltzen diren garraio moten artean, %25 edota hirietan, baita %60 ere, bizikletak dira.
Tren berdean ibiltzeko aukerarekin hasiko da Mugikortasun Astea, asteazkenean.
Gimnasia eta ginkana, ariketa egiteko beste bi modu
Irailaren 20rako beste proposamen bat ere egin da. Goizeko 11:00etatik 12:00ak bitartean, helduentzako gimnasia saio gidatua izango da Joseba Barandiaran plazan, eta parte-hartzea irekia izango da.
Ariketa egiteko beste aukera, ostiralean, irailaren 21ean izango da: ginkana prestatuko da, 17:00etatik aurrera, Herri Eskolako patioan, eta bukatzeko txokolatea emango da, bizkotxoekin.
Elkartuk, hitzaldia
Programa borobiltzeko, hitzaldia emango du irailaren 24an Elkartu federazioak, Herri Eskolako areto nagusian. Gipuzkoako Gutxitasun Fisikoa duten pertsonen Federazio Koordinatzailea da.
MUGIKORTASUN ASTEA
Irailak 19
17:00 eta 18:00, Tren berdea, Joseba Barandiaran plazatik aterata.
Irailak 20
11:00-12:00, Helduentzako gimnasia, Joseba Barandiaran plazan.
19:00, Why we cycle pelikularen proiekzioa, kultur etxean.
Irailak 21
11:00, Ibilaldia, Joseba Barandiaran plazatik Martutenera, bidegorrian barrena. Ondoren pikoteoa, udaletxean.
17:00, Ginkana eta txokolatea bizkotxoekin, Herri Eskolako patioan.
Irailak 24
17:00, Hitzaldia, Elkartu Federazioaren eskutik, Herri Eskolako areto nagusian; Gipuzkoako Gutxitasun Fisikoa duten pertsonen Federazio Koordinatzailea.