Maiatzeko plenoan aurkeztu zuen EH Bilduk mozioa, Gazte Asanbladaren txosna bere tokian mantentzea eskatuz; eta EAJren abstentzioarekin eta PSE-EEren babesarekin, onartu egin zen. Horren harira, bere postura azaldu nahi izan du EH Bilduk: «ez genuen aurreikusten moziorik, baina EAJk Gazte Asanbladarekin izandako jarrera eta egindako mespretxua salatzeko, aurkeztea erabaki genuen. Bere izena eta izana zikintzen saiatu da prentsan, hitza bete ez izana leporatuz; baina maiatzeko jai batzordean, argi geratu zen hori ez zela horrela. EH Bilduko ordezkariak galdetu zion, EAJko jaietako zinegotzi ohiari, txosnaren lekualdatzearen inguruan adostasunik lortu ote zuten; eta ezetz erantzun zion, proposatu besterik ez zutela egin. Hala ere, EAJ buru belarri aritu da, Gazte Asanbladari hitza ez betetzearen ardura leporatzen».
«Kokaguneak urtero aldatzea, soluzioa baino gehiago, buruhaustea da»
EH Bilduk azaldu du, bizilagunekin zituen konpromisoetan oinarritu duela lekualdaketa EAJk, baina oposizioak ez duela «inoiz» izan akordio horren berri. Eta gaineratu du, «zalantzarik ez» duela, txosnak molestiak sorrarazten dizkiela inguruko bizilagunei, baina urtean zehar, horrelako egoerak bizi dituztela beste hainbat zonaldetan ere: «jaiek ez dute onetik bakarrik. Zeharkako ondorioak ere badaude, eta Udala, herritar eta eragileak, horiek murrizten saiatu beharko lirateke. Baina soluzioa ez da kokaguneak urtero aldatzea. Hori, soluzioa baino gehiago, buruhaustea izan ohi da».
Nabarmendu du, egitekotan, alternatiba bideragarria eta adostua dagoelako izan behar dela: «baina kasu honetan, adostasunik ez egoteaz gain, EAJren alternatibak bideraezin egiten zuen txosna, estalkiaren murrizketagatik. Argi daukagu txosnagunea herriko jaietarako oinarrizko espazioa dela. Urteak dira, gune honek jaiak osatu eta aberasten dituela», nabarmendu du.