Sagardogintzari lotuta, lurraldea, bertako kultura eta historia ezagutzeko aukera izango da udara honetan, sektoreak martxan jarri duen Sagardo Tour eskaintzari esker. Gipuzkoako Sagardogileen Elkarteko 11 sagardotegik hartuko dute parte proiektuan, eta tartean, Astigarragako Petritegik eta Astarbek.
Sagardotegiak bisitatzeaz gain, aukera izango da gertutik ezagutzeko Bertako Produktuen Azoka, Idiazabal JDB Gaztandegia, Albaola Itsas Kultur Faktoria edota Flyscharen Ibilbidea.
Lau ibilbide, aukeran
Proposatzen dena da, proiektuan parte hartzen duten sagardotegietan bisita gidatuak egitea, bertako familia, baserria eta sagastiak ezagutzeko, eta tolareak eta bertan lan egiteko modua zein den ikasteko. Baita sagardoa probatzea eta sagardotegiko menu tradizionala dastatzea ere. Baina horrez gain, sagardotegiko bisita ibilaldi batekin osatu ahal izango da.
Batetik, Bertako Produktuen Azoka, Tolosakoa, ezagutu ahal izango da. Bestetik, Zeraingo Idiazabal JDB Gaztandegia. Beste aukera bat izango da Albaola Itsas Kultur Faktoria ezagutzea, Pasaiakoa; eta azkenik, Zumaian, Flyscharen ibilbidean barrena ibiltzea.
Bisitak larunbatetan egingo dira, irailaren 8ra arte, eta lau hizkuntzatan eskainiko dira: euskeraz, gaztelaniaz, frantsesez eta ingelesez. Donostiako Republica Argentina kaleko 2 zenbakiko geltokian izango dute abiapuntua, 11:15etan, eta bost orduko ibilbidea egingo dute. Dena den, Baiona, Biarritz, Donibane Lohizune eta Hendaian ere jarri dituzte geltokiak. Prezioak desberdinak izango dira, parte-hartzaileen adinaren arabera.
Sagardotegi batean bazkaldu eta bisitak egingo dira Bertako Produktuen Azokara, Idiazabal Gaztandegira, Albaolara eta Flyschera.
Hurrengo bisita, larunbatean
Ekainaren 23an egin ahal izan zen aurreneko bisita, eta hurrengoa, larunbat honetan egiteko aukera izango da. Kasu honetan, Idiazabal Gaztandegia bisitatu, eta ondoren, Zeraingo Oiharte sagardotegira joango dira. Gaztandegia ezagutu nahi dutenek, izango dituzte beste bi aukera, bisita beste bi sagardotegirekin lotuta: uztailaren 28an, Ordiziako Tximista sagardotegian bukatuta, eta abuztuaren 25ean, Azpeitiako Añotan bukatuta.
Bertako Produktu Azoka ezagutu nahi duenak, berriz, uztailaren 21ean izango du aukera, eta ondoren, Donostiako Araeta sagardotegira joan ahal izango du. Bestela, abuztuaren 18an egin ahal izango da ibilaldia, eta Hernaniko Iparragirre sagardotegian bukatu.
Hirugarren aukera, Albaola Itsas Kultur Faktoria ezagutzea da. Uztailaren 7an, Astigarragako Petritegi sagardotegian bukatuko da bisita hori; abuztuaren 4an, Irungo Olan; eta irailaren 1ean, Astigarragako Astarben.
Azkenik, Flyscharen Ibilbidea egitea aukeratzen duenak, uztailaren 14, abuztuaren 11 eta irailaren 8a izango ditu aukeran, eta Azpeitiako Añota, Aiako Satxota eta Usurbilgo Saizar sagardotegiak aukeran, hurrenez hurren.
Erreserbak, aurretik
Aurreneko bisita pasa den larunbatean egin zen. Ordukoan, Bertako Produktuen Azoka bisitatu eta Adunako Aburuza sagardotegira joateko aukera izan zen. Larunbat honetan, Idiazabal JDB Gaztandegia bisitatu ahal izango da, eta irailaren 8ra arte, larunbatero egin ahal izango da bisitaren bat.
Plan guztietarako, erreserbak interneten egin daitezke dagoeneko, www.sagardoa.eus webgunean; edota telefonoz, 943 33 68 11 zenbakian.
Proiektua hil honen hasieran aurkeztu zuten, eta Foru Aldundiaren Explore San Sebastian Region eta Jaurlaritzaren Basquetour markekin lotuta dago; hainbat eskaintza biltzen dituzte.
SAGARDO TOUR
Bertako Produktuen Azoka
Uztailak 21, Araeta (Donostia).
Abuztuak 18, Iparragirre (Hernani).
Idiazabal JDB Gaztandegia
Ekainak 30, Oiharte (Zerain).
Uztailak 28, Tximista (Ordizia).
Abuztuak 25, Añota (Azpeitia).
Albaola Itsas Kultur Faktoria
Uztailak 7, Petritegi (Astigarraga).
Abuztuak 4, Ola (Irun).
Irailak 1, Astarbe (Astigarraga).
Flyscharen Ibilbidea
Uztailak 14, Añota (Azpeitia).
Abuztuak 11, Satxota (Aia).
Irailak 8, Saizar (Usurbil).