Hamaika urte daramazkite hernaniarrek, San Joan jaiak erretratatzen, Kronikaren argazki lehiaketarekin. Eta aurten ere, herritar guztiei zabaldu die deia, beraien argazkiak bidaltzeko, festetako irudi berezi, eder, bitxi, ikusgarri, esanguratsu edota originalenekin. Eta saria lortzeko aukera izango dute!
Aurten, bi sari banatuko ditu Kronikak; helduentzat bat, eta haurrentzat (14 urtera arte) bestea. Helduen kategorian, saria izango da 3 botila Albariño Lagar de Cervera 2017 eta 3 botila Viña Ardanza Reserva 2009. Eta haurren kasuan, saria izango da buruarin bat, Tantairen eskutik.
Argazkiak bidaltzeko aukera, ostegun eguerdira arte
Lehiaketan, edozeinek hartu dezake parte, baina argazkiak formatu digitalean entregatu behar dira, eta San Joan jaien ingurukoak izan behar dute.
Ekainaren 28ko eguerdiko 12:00ak arte egongo da epea zabalik: kronika@kronika.eus emailera bidalita; edo bulegora bertara ekarrita (Larramendi kalea, 11). Jakinarazi beharko dira, izena eta telefonoa; haurren kasuan, adina ere bai.
Irabazleen aukeraketa, irakurleen esku
Behin argazki guztiak jasota, argazki onenen aukeraketa bat egingo du Kronikako epaimahaiak; eta ikusgai jarriko ditu www.kronika.eus web orrian, asteazkenean bertan. Hortik aurrera, ikusleek bozkatuko dituzte argazki onenak, uztailaren 1eko 12:00etara arte; bakoitzak, bi argazki: helduen bat, eta haurren beste bat.