Asteazkeneko Plenoan sei puntu aztertu zituzten, eta azkar joan zen prozesua, adostasuna erakutsi baitzuten zinegotzi guztiek.
Zazpigarren puntuan, aldiz, EH Bilduk eta PSE-EEk elkarrekin mozioa aurkeztu zuten, jangela haunditzearen inguruko obrari lotuta, eta hor agertu ziren desadostasunak. EAJ-PNVko zinegotziek aretoa uztea erabaki zuten, eta beraz, haien abstentzioarekin eta EH Bildu eta PSE-EEren aldeko botoekin, onartu egin zen.
Etxez etxeko laguntzetako aldaketa, jendaurrean
Gai ordeneko puntuak azkar aztertu zituzten. Aho batez onartu ziren aurreko plenoko akta eta etxez etxeko laguntza zerbitzua arautzen duen udal araudian aldaketa egitea. Azken honen kasuan, orain 30 egunez egongo da jendaurrean araudi hori, nahi duenak erreklamazioak egiteko aukera izan dezan.
Aho batez onartu zen baita ere Udalaren eta Euskal Herriko Unibertsitatearen arteko lankidetza-hitzarmena. Zorione Etxezarraga alkateak azaldu zuen ekimen desberdinetarako hitzarmen zehatzak egingo direla aurrerago, eta kasu bakoitzean beharrak aztertuko direla.
Santiomendiko aterpe eta natur eskolaren kudeaketa-kontratua luzatzea ere, aho batez onartu zen. 2019ko abuztuaren 31ra arte Sasoi-Sport S.L. enpresak jarraituko du kudeaketaren kargu egiten.
Azkenik, bost eta seigarren puntuak ere aho batez onartu zituzten: alkatearen eskumenak plenoari emateko dekretu aldaketa eta kontratazio espedienteak irekitzeko akordioak. Udaletxearen funtzionamendua errazteko, baldintza tekniko eta administratiboen aldaketak zirela azaldu zen.
Jangelarako proiektu berria idazteko eskaera, mozioan
Bukatzeko, mozioa aurkeztu zuten EH Bilduk eta PSE-EEk elkarrekin, Herri Eskolako jangela haunditzeko obrei lotuta.
«Aurkeztutako jangelaren haundipen proposamena bertan behera uztea» eskatu dute EH Bilduk eta PSE-EEk.
Andoni Gartzia, EH Bilduko bozeramailea kexu azaldu zen, batetik, jangela haunditzeko proiektua «oposizioari aurkeztu ez» izanagatik». Era berean, adierazi zuen «EH Bildu eta PSE-EE udal taldeek Astigarragako Herri Eskolak OOGk egiten duen eskaerarekin bat» egiten dutela. Hori horrela, mozioaren bidez, bi alderdiek eskatu zuten «Astigarragako Herri Eskolako Gurasoei eta Zuzendaritzari aurkeztutako jangelaren proposamena behin-betikoz bertan behera uztea; 2017ko ekainaren 21ean Udal Osoko Bilkurak aho batez hartu zuen erabakia oinarri hartuta, gainean gutxienez solairu bat bermatuko duen jangelaren haundipena aurreikusiko duen proiektua 2018an idaztea; 2019ko udan, gutxienez, jangelaren haundipena egitea; eta erabaki hau Astigarragako Herri Eskolako Zuzendaritzari eta Guraso Elkarteari, Udaleko Hezkuntza, Obrak eta Zerbitzuak eta Hirigintza sailei eta Gipuzkoako Hezkuntza Ordezkaritzari jakinaraztea».
EAJk azal du jangelaren haundipena bultzatzen ari dela, «Hezkuntzak onartu duen lan-ildoa jarraituz».
Zorione Etxezarraga alkateak, berriz, azpimarratu zuen «aurreko haundipena egin zuten arkitektoekin» aritu dela Udal Gobernu Taldea lanean, Delegaritzak esan bezala «aldi baterako gelak bilatzea ez genuelako ikusten». Hain zuzen, horregatik bururatu zitzaiela Arrobitxuloko proposamena. «Ez dugu egin aurreko legegintzaldiarekiko desberdina den ezer». Gaineratu zuen «Hezkuntzak onartu duen lan ildoa jarraituz haundipena bultzatzen» ari direla.
Mozioa bozkatzeko unean, EAJko zinegotziek aretoa utzi zuten, desadostasuna adieraziz, eta beraz, EAJren abstentzioarekin eta EH Bildu eta PSE-EEren aldeko botoekin onartu zen mozioa.