Hernanin jokatuko da gaur, pelota torneo garrantzitsuenetako baten finala: Berria Txapelketarena. Kiroldegiko frontoian izango da, arratsaldeko 17:00etan hasita, eta Tolosako Aurrera-Tolosa eta Iruñako Oberena taldeak ariko dira.
Finala orekatua espero da, eta ikuskizuna ziurtatuta dago, antolatzaileek aurreratu dutenez. Beraiek izan dira, orain arteko bidean onenak: Aurrera-Tolosak kanpoan utzi ditu Ultzamako Buruzgain, Zeanuriko Joko Alai eta Azpeitiako Ilunpe; Oberenak, berriz, menderatu ditu Munitibarko Lea Ibarra eta Lazkaoko Lapke.
Nagusien mailako partidua, erabakigarria?
Kadete mailan, Tolosako Altuna eta Ugartemendia ariko dira, Oberenako Laso eta Igoaren kontra. Maila haundiko partidu gogorra espero da. Tolosarrak dira faborito, Gipuzkoako txapeldunak. Baina Oberenakoa ere, bikote sendoa da; bi esku bikain ditu Igoak, eta Lasok ondo bukatzen du aurrean.
Jubeniletan, baja garrantzitsu bat izango dute nafarrek, Mata lesionatuarena; horrek partidua berdinduko du. Oskoz eta Ganboa ariko dira Oberenarekin, eta Lasa eta Etxeberria Tolosarekin. Bi atzelari sendo, eta bi aurrelari errematatzaile.
Akaso, jaialdiko hirugarren eta azken partiduan erabakiko da finala: Labaka eta Telletxea ariko dira Tolosarekin, esperientzia haundiko pelotariak; eta gaztetasunaren alde egingo du Oberenak, Ansa eta Cordonekin. Zaila izango dute nafarrek, bikote sendoa osatzen baitute albizturdarrek, eta oso ondo ezagutzen dute elkar.