Musikarik ez dute falta, goizez, arratsaldez zein gauez, San Joan jaiek. Eta dantzarik ere, nekez faltako dute, gaurtik asteazkenera bitarte; gaur eguerdiko 12:00etan, txupinazoa botatzearekin batera, Ttarla dantza taldeko kideek herria dantzan jartzen dutenetik.
Jaurti eta berehala, arin-arin, lehertuko da suziria zeruan. Eta beste behin, jaien aurreneko egunean, San Joan suak jarriko du magia, Plazan.
Baina ez dira faltako, musika eta dantza bezala, San Joan bezperako ekintza bereziak ere. Gazteen Axeri Dantzarekin eramango dute jendea Plazara, txupinazoaren zitara. Haurren marrazki eta karabina tiro lehiaketak ere izango dira, eta esku pelotako Berria Txapelketaren finala ere bai.
17:00etan hasiko da bezperako giro berezia pizten, Plazan. Aurreskua dantzatuko dute haurrek, ordu horretan. Ordu erdi beranduago, Akelarrearen iragarle txikiak aterako dira kalera, zita 16.45etan jarri dute Paradorrean, eta 18:30etan, Akelarrea abiatuko da kalejiran, herria sorgintzera. Plazan egingo dute antzerkia.
Suari bidea, kantuan eta musikarekin ere egingo diote: San Joan erronda, Kantuz eta Ozenki abesbatzen kontzertua, Salbe Nagusia, Musika Bandaren San Joan Martxa... Eta 21:30etan piztuko dute sua, Plazan. Gainerakoan, suak egiteko, aurrez eskatu behar zen baimena, udaletxean.
Zamalanetan eta hondakin bilketan, aldaketa Kaxkoan
Udalak, eskerrak eman nahi izan dizkie, jaiak antolatzen dituzten guztiei. Eta «ez daudenak gogoan hartuz», «errespetuan» ondo pasatzera animatu ditu, «bertakoak eta bisitariak». Eta aditzera eman du, baita ere, aldaketak izango direla Kaxkoko zamalanen ordutegian eta hondakin bilketan. Zamalanetarako, ezingo da Kaxkoan sartu, ekainaren 24, 25 eta 26an; 23an, goizeko 09:30ak arte bakarrik; eta 27an, 13:00etatik 14:30etara. Hondakinak, Kaxkoan eta erdigunean, 12:30etatik 14:00etara atera beharko dira. Eta larunbatetako errefusa astelehenean atera beharko da.