San Joan jaien egitarauaren harira, kritiko azaldu da Hernaniko EAJ-PNV, EH Bildurekin. «Udaleko zinegotziekin lotutako bi kontzeptu daude: Udal Korporazioa, zinegotzi guztiok osatzen duguna; eta Gobernu Taldea, legegintzaldi honetan EH Bilduk osatzen duena. Bi kontzeptu horiek ezagututa, zein uste duzue azaldu behar zela, gure herriko jaien egitarauaren sinaduran? Noski, normalena litzateke Udal Korporazioa azaltzea. Baina ez, Gobernu Taldea bakarrik ageri da. EH Bilduren beste errespetu falta bat, gainerako zortzi zinegotziekiko; EH Bilduk baino hernaniar gehiago ordezkatzen ditugunak EH Bilduren kontzeptua garbia da, jaiak bereak bakarrik dira», dio EAJk.
«Jaietan eta Preludioan, ez litzateke aldarrikapen politikorik egin beharko»
Era berean, Hernaniko jeltzaleek adierazi dute, uste zutela gainditua zegoela, «edozein espazio kultural erabiltzearena, ikusarazteko gure herriko errealitate bat, presoena. Uste genuen hurrengo fase batean ginela, eta haien egoera aldarrikatzeko tokia plenoa izango zen, non talde politiko guztiek bilatzen dugun hurbiltzea eta kolektibo horren giza eskubideen errespetua». Horrekin batera, Andoni Amonarraiz bozeramaileak nabarmendu du, «herriko jaietan, Preludioan eta ekintza guztietan orokorrean», ez litzatekela «aldarrikapen politikorik egin beharko».
EAJk nabarmendu du, azkenik, «herri honen alde lanean» jarraituko duela: «baina despreziatzen gaituzten parametro zaharkituak aldatzen ez diren bitartean, ez gara EH Bildurekin azalduko berriro, ekintza ludikoetan», aurreratu du.