Sasoiko jarraitzen dute pelotari hernaniarrek; eta sasoiko dago, bereziki, Jon Jara infantila. Zuloaga Torneoko txapela jantzi zuen asteartean, Orbegozo añorgarrarekin, Errenterian. 18-10 irabazi zieten finala, Ilarregi eta Lizeagari. Aurretik, Ballarena eta Telleria kanporatu zituzten final laurdenetan (18-8), eta Zubizarreta eta Gabirondo semifinaletan (18-8). Aurreneko aldia zuten elkarrekin jokatzen, baina ederki moldatu ziren bikote bezala.
Eta Jarak berak, beste final bat jokatuko du gaur, Unai Etxarri hernaniarrarekin, Udaberri Torneoan. Ordizian izango da, 20:00etan, eta Gazteleku taldeko Arrillaga eta Beloki izango dituzte aurrean. Txapelketan jokatutako 9 partiduak irabazi dituzte bi bikoteek, eta final orekatua espero da.
Euskal Herriko Elite finala bihar, Markel Lizeagak
Eta biharkoan, beste hernaniar batek bilatuko du txapela: Markel Lizeagak, Euskal Herriko Elite Torneoan. Zumarragan izango da, 17:00etan, eta Santxo usurbildarrarekin, faborito dira, Azpiri eta Madariaga bizkaitarren kontra.
Denboraldiko 12 pelotari onenek jokatzen dute torneoa; bertan izan dira Ioritz Arrieta eta Eneko Aizpitarte ere, eta 12 onenen artean zen Paul Ojuel, baina sukarrak jota, ezin izan du torneoa jokatu.