Aurrea hartuko diote San Joan jaietako egitarauari Gaztelekuan aritzen diren gazteek. Urtero bezala, ikasturtea bukatu dela eta San Joanak hemen direla ospatzeko, festatxoa egingo dute bihar. Su* Festa izango da Ave Maria parkean egingo dutena, arratsaldeko 17:30etatik 20:30etara bitarte.
Bertan, denetarik egiteko aukera izango dute 12 eta 17 urte bitarteko gazteek: graffity tailerra, zinta lasterketa, DJa zuzenean, eta azkenik, merendola. Gaztelekuan parte hartu edo ez, irekia izango da herriko gazte guztientzat.
Datorren asteartean, beste ekintza bat
Hori ez da, ordea, ekaineko azkeneko ekintza izango. San Joanen bueltan beste bat egingo dute: Arku Tiroa. Datorren asteartean izango da, eta hau ere, 12 eta 17 urte bitarteko gazte guztiei irekia izango da.
Goizeko 11:00etatik 13:00etara izango da hurrengo zita, Tilosetan.