Pasa den ostiralean margotu ziren pelotalekuko eskailerak, LGTBI+ kolektiboa sinbolizatzen duten koloreekin, eta EH Bildu kritiko azaldu da: «ekimen honek ez du errespetatu plenoak erabakitakoa».
«Ez herritarrekin, ez eragileekin, eta ezta adostutako egunean ere»
EH Bilduk azaldu du «lotsagarria eta onartezina» iruditu zaiola, «udal gobernuak oposizioari, herritarrei eta eragileei dien errespetu falta. Ez ditu udal osoko bilkurak errespetatzen eta guztion gainetik berea inposatzen du argazkia lortzeko».
Batetik, argudiatu du berandu jakin zuela ekimenaren berri. «EH Bilduk eguerdiko 12:50etan jakin zuen 13:00ean margoketa egingo zela. Eguerdiko 12:00etan Berdintasun batzordea izan genuen eta oposizio guztia bertan egonda ere, ez zitzaigun jakinarazi».
Era berean, gogorarazi du «ekimen hau EH Bilduk proposatu eta eskatutakoa» dela. «Iazko ekaineko plenoan onartu zen egitea, eta aurreko maiatzean EH Bilduk aurkeztutako beste mozio batean berriz onartu zen. Hala ere, EH Bildu ekimena baino 10 minutu lehenago izan da ohartarazia».
Azkenik, plenoan erabakitakoa ez duela errespetatu dio; «ez da egin ez herritarrekin, ez eragileekin, eta ezta adostutako egunean ere». Izan ere, 2017ko ekainaren 21eko eta 2018ko maiatzaren 30eko plenoetan onartu zen, «aho batez», margoketa egitea, «ekainaren 28an, herritar eta eragile desberdinekin».