Irailaren 10etik urriaren 5era arte aurkeztu ahal izango dira argazkiak, 2019ko udal egutegia osatzeko lehiaketan. Baina gaia ezagutzera eman du dagoeneko Udalak, «argazkilaritza zaleek irudiak egin eta aukeratzeko denbora luzeagoa izan dezaten»; ‘Harremanak eta loturak’ izango da gaia.
Erosketa txartelak, sari
Udal egutegia osatzeko argazki lehiaketa antolatzen den hirugarren aldia da. Aurretik, Hernani Kuttuna eta Arkiteknatura izan dira gaia, eta aurten, ‘Harremanak eta loturak’.
«Gai zabala eta interpretaziorako oso aberatsa» aukeratu dute: «pertsonen arteko harremanak, eraikinen artekoak, naturaren eta pertsonen arteko loturak, animalien artekoak... Estetikoki ederrak edota sentimenduak pizten dituztenak... Egilearen esku dago gaiak zer iradokitzen dion irudi batean islatzea».
Gaia librea bada ere, baldintzak dira argazkiek Hernanin kokatuta egon behar dutela, eta irudia laguntzeko izenburu edo deskribapen bat jarri behar dela. Egile bakoitzak 5 argazki aurkeztu ahal izango ditu, irailaren 10etik urriaren 5era, udaletxeko HHZn, bi gutunazaletan: batean irudiak, eta bestean, izen-abizenak eta harremanetarako datuak.
Saridun bakoitzak, Berriak elkarteko dendetan gastatzeko 40 euroko erosketa txartela jasoko du opari; egile bakoitzak, gehienez, bi.