SOS Arrazakeriak daukan islamofobia eta generoari buruzko egitasmo batekin lotuta, topaketa antolatu dute biharko Amher eta Atawafok elkarteek, Udalaren laguntzarekin: Emakume musulmanak, arrazakeria eta sexismoa.
Saio bat goizez izango da, 11:00etatik 14:00etara, eta bestea arratsaldez, 16:00etatik 18:00etara; bihar, Amherren egoitzan (Transpakarren). Haurtzaindegi zerbitzua jarriko da, baina eskatu egin behar da: 943 32 18 11.
Goizez, musulmanak; arratsaldez, denak
«Asmoa da elkarren artean ezagutu, aurreiritziak apurtu eta sareak ehuntzeari bidea» egitea. Horrela, bi saio antolatu dira.
Goizean, emakume musulmanen topaketa egingo da, bizi duten egoeraren berri elkarren artean partekatzeko.
Arratsaldean, berriz, emakume musulman eta musulmanak ez direnen arteko topaketa egingo da, elkar ezagutza sustatzeko.
Donostian, errefuxiatuen alde
Bestalde, bihar baita ere, Pertsona Errefuxiatuen Nazioarteko Eguna aldarrikatzeko, hiru zutabeko manifestazioa egingo da Donostian; 12:00etan aterako dira Egia, Gros eta Antiguotik, eta 13:00ean elkartuko dira Alderdi Ederren, «migrazio politika duinak eta eraginkorrak» eskatzeko. Performancea egingo da bertan. Amherrek ere parte hartuko du, eta maleta batekin joateko dei egin dute. yy