Urtero bezala, makina bat txapelketa antolatu ditu aurten ere, San Joan jaien bueltan, Txantxangorri elkarteak.
Larunbat honetan bertan izango dira aurrenekoak. Batetik, haurrentzako karabina tiro lehiaketa izango da elkartean bertan. 2002 urtetik aurrera jaiotakoentzat da, eta kanporaketak jokatuko dira larunbatean: goizean 10:00etatik 13:00etara, edo arratsaldean 17:00etatik 19:00etara. Elkartean bertan dago, apuntatzeko zerrenda. Sailkatzen direnek, ekainaren 23an jokatuko dute finala.
Eta larunbat honetan izango da, baita ere, compack sporting txapelketa, Irungo San Martzial tiro eremuan. Bertan eman beharko da izena, goizeko 09:30etatik 10:30etara.
Igandean jokatzekoa zen, bestalde, usakume tiraketa txapelketa, Jauregiko zelaietan; baina bertan behera geratu da, Hernaniko Udalak baimena eman ez duelako.
Haurren arrantza lehiaketa, Urumea ibaian
Datorren astean izango dira beste hiru txapelketa. Aurrena, hilaren 23an, hobi unibertsaleko plater tiraketa egingo da, Hondarribiako San Telmo tiro eremuan, 11:00etatik aurrera; 18:00ak arte apuntatu daiteke.
Eta 24an izango dira azkeneko biak. Batetik, jokatuko da haurren arrantza lehiaketa, Urumea ibaian. 08:30etan jarri dute zita, Zubipe aurreko eskaileretan; 09:00etatik 12:00etara izango da proba. Elkartean eman behar da izena, hilaren 22a baino lehen.
Eta bestetik, probintzia eta elkarte mailako erakustxakur ehiza txapelketa egingo dute, Urnietako Xoxokako zelaian, goizeko 09:00etan hasita.