Igande honetarako, topaketa antolatu dute Amher elkartearen egoitzan, Amherrek berak, SOS Arrazakeriak eta Atawafok elkarteak: Emakume musulmanak, arrazakeria eta sexismoa. Goizean eta arratsaldean egingo dute saio bana, egunerokoan emakume eta musulman izateagatik dauzkaten oztopo, diskriminazio eta arazoei buruz.
Goizean, 11:00etan hasi eta 14:00ak arte, emakume musulmanen topaketa izango da; beraien artean komentatuko dituzte dauzkaten oztopoak, eta eztabaidatuko dute, nola egin diezaieketen aurre.
Aurreiritziak apurtu eta sareak ehuntzea, asmoa
Arratsaldeko saioan, berriz, emakume musulmanak eta ez musulmanak elkartuko dira. «Topaketa honen asmoa da, elkarren artean ezagutu, aurreiritziak apurtu eta sareak ehuntzeari bidea egitea. Horretarako, landuko dugu emakume ez musulmanek nola ikusten dituzten musulmanak, eta hauek nola hartuta sentitzen diren», aurreratu dute. Arratsaldeko 16:00etatik 18:00etara izango da bigarren saio hori.
Jakinarazi dute, gainera, haurtzaindegi zerbitzua izango dela, bi saioetan.