Ez da asteburu ona izan, pelotari hernaniarrentzat, Herriarteko Txapelketan. Bereziki mingarria izan da esku pelotarientzat: final laurdenetako bueltakoa zeukaten jokoan, Azkoitian, eta 1-2 galdu zuten berriro. Horrenbestez, txapelketatik kanpo dira.
Bi partidu irabazi, eta bost tantoren desabantailari buelta eman behar zioten hernaniarrek. Eta hori lortzeko, ondo baino hobeto egin zituzten lanak, Paul Ojuel eta Eneko Aizpitarte seniorrek, 22-5 irabazita. Baina ordurako berandu zen: 15-22 galdu zuten Unax Uitzi eta Mikel Lasa kadeteek, eta 17-22 Xabier Salaberria eta Ekaitz Insausti jubenilek.
Palan, 20-19 irabazi zuen Iñaki Kerejetak, zazpi barruan, final haundira sailkatzeko esperantzari eusteko.
Hortaz, seniorren partidua jokatu baino lehen, kanporaketa galduta zuen Hernanik. «Zerbait gehiago egitea posible zelako sentsazioarekin» gelditu direla onartu dute.
Palistek, berriz, semifinaletako joanekoa zeukaten, Loiolan, Donostiaren kontra; txapelketa irabazteko faboritoaren kontra, hain justu. Etxekoak nagusitu ziren, baina gauzak zail jarri zizkieten hernaniarrek, eta aukerak badauzkate oraindik, aurrera egiteko.
Aritz Murgiondok, 9-20 galdu zuen buruz buru; eta galdu egin zuten Eneko Lujanbiok eta Aiheko Zubimendik ere, binaka (14-20). Baina zazpi barruan, esperantzari eusteko garaipena lortu zuen Iñaki Kerejetak, 20-19 irabazita.
Bueltakoa ostiralean jokatuko dute, 20:30etan kiroldegiko frontoian, finalaren bila.
Neskentzat ate irekiak gaur, esku pelota probatzeko
Eta frontoian bertan, ate irekien jardunaldiak antolatu dituzte, gaur eta datorren asteartean, esku pelota probatu nahi duten neska alebin eta infantilei zuzenduta. Arratsaldeko 16:30etan hasiko da saioa, bi egunetan; eta gerturatzera animatu dituzte, nahi duten neska guztiak.