Goizeko 10:30etan abiatu ziren atzo 10 autobus Hernanitik, Aginagako kilometrora, Gure Esku Dagok antolatutako giza-katea osatzera; hainbat herritar beren kabuz ere joan ziren, baita bizikletan ere. «100.000 lagun espero ziren, eta 175.000 izan dira. Hernaniarrak 1.700 inguru izan direla zenbatu da», zioten Hernaniko Gure Esku Dagotik.
Goizueta eta Aranotik ere, herritar ugari bildu zen Zarautzen. Bide batez, Altsasuko espetxeratuekin elkartasuna adierazteko aprobetxatu zuten atzoko zita, askok.
Eguna borobilduta, Hernaniko Gure Esku Dagotik pozik agertu dira, eta aurrera begira lanean jarraitzeko dei egin dute. «Horrelako ekitaldiak behar-beharrezkoak dira. Horrelakoak eginda zaila da lortu nahi duguna lortzea, baina horrelakorik gabe, ez da posible izango. Jarraitu behar dugu». Orain artekoagatik, berriz, eskerrak eman dituzte: «Igande goiz batean, horrelako eguraldiarekin, ez da erraza hainbeste hernaniar mobilizatzea. Eskertzekoa izan da hernaniarren ahalegina eta ardura».
«Orain arteko jendetsuena»
Anjel Oiarbide, Gure Esku Dago mugimenduko bozeramaileak ere azpimarratu zuen «orain arte egin dugun mobilizazio jendetsuena» izan dela, baina «entsaio bat besterik ez» dela izan.
Giza-katea bukatzean irakurritako adierazpenarekin lotuta (osorik: www.kronika.eus), etorkizunera begira lanean jarraitzeko dei egin zuen. «Hor egon garenak sentitu dugu zer egiteko gai garen elkarrekin arituz gero. Bidea ez da hemen bukatzen».