Asteburua ezin hobeto borobiltzen ari da Hernani Errugbi Elkartea. Errugbi Barneratzailea Txapelketa atzo jokatu zen Landaren, eta kiroltasuna eta laguntasuna ondo barneratuta dauzkatela erakutsi zuten guztiek. Gaur segiko du azokak.
Saria denek; txapela Hernanik
Bazkaltzera Garagardo Azokara joan ziren, eta han banatu zizkieten sariak Richard Oribe igerilari paralinpikoak, eta Koro Etxeberria eta Isa Sanchez zinegotziek.
Oroigarri eta dominak, denentzat: Universitario Bilbao, Gaztedi, Clan Tri Espurna Cullera eta Hernanirentzat. «Baina errugbia kirola da, eta lehia gustatzen zaigu», azaldu zuen Jon Insausti, antolatzaileetako batek. Horregatik, txapela eman zioten irabazleari: parte-hartzaileena, alaiena, joko garbienekoa eta kalitate onenekoa zen taldeari. Entrenatzaile, parte-hartzaile eta arbitroek eman zuten botoa, irizpide horien arabera, eta Hernanin geratu zen txapela!
Garagardo Azoka, gaur arte
Denboraldia bukatzeko bazkaria izango da gaur azokan, baina klubekoak ez diren guztiek ere aukera izango dute gozatzeko. Eguerdiko 12:00etan irekiko da barra, eta gaueko 01:00ean itxi. Sukaldea, berriz, irekiko da 13:30etatik 15:30etara eta 19:30etatik 23:00etara.