Txirrindulari gazteenen asteburua izan da pasa dena, hala islatzen baitute emaitzek.
Alebin mailakoak Irunen jokatu zuten MTB probako zirkuitua, eta maila ederra erakutsi zuten lau korrikalari aurreneko 15 postutan sailkatuta.
Gainera, podiumean, hirutik bi izan ziren astigartarrak: Astigarragako Herri Eskolan ikasi, baina Otxe txirrindulari eskolako Eneko Oliveira eta Eneko Indo izan ziren garailea eta hirugarren sailkatua, hurrenez hurren. Horrez gain, hamaikagarren izan zen Mundarroko Unax Aranburu, eta hamalaugarren, Markel Galarraga.
Romero protagonista, Lezon
Kadeteak alebinetik gertu izan ziren; hain zuzen, Lezon jokatu zuten hamalaugarren Mendekoste Saria. 108 txirrindularik hartu zuten parte, eta Irabiako Aitor Alberdi nafarrak irabazi zuen.
Astigartarren presentzia berezia izan zen; bereziki, Jaime Romerok izan zuen protagonismoa. Hasteko, zirkuituaren bigarren bueltan erori, eta ia minutu bat galdu zuelako. Gurpila aldatu, eta ihes egin zuen seiko taldean sartzea lortu zuen. Bukaeran, saiatu zen ihes egindakoak topatzen, beste txirrindulari batekin, baina ez zuen lortu. Eta azkenean, zazpigarren iristea lortu zuen.
Hamasei segundora iritsi zen Eneko Azparren, 22garren postuan.
Jaime Romero protagonista izan zen Lezon.
Juniorrak, igandean
Igandean izan zuten proba junior mailakoek; Anoetako M. Oiartzabal-A. Urkola Memorialean aritu ziren. Tartean izan zen Telmo Semperena, urrutitik saiakerak egin zituen, eta lortu zuen bakarka ihesaldi bat egitea. Baina Orendainen tropelarekin topo egin, eta helmugatik 200 metrora indarrik gabe geratu zen. Azkenean, tropela desegiten joan zen, eta bederatziko talde batekin iritsi zen helmugara, 29garren geratuz.
Zumaian, hitzordu bikoitza
Gaur zita bikoitza izango dute Zumaian: goizean, juniorrek Jose Mari Korta memoriala jokatuko dute, eta arratsaldean, alebin eta infantilek, Zumaiako Sari Nagusia. Kadeteak Lizarran arituko dira gaur, eta bihar, Oñatin. Bihar izango da, baita ere, open-en txanda, Ataunen izango dira.