Edizio borobila izango du aurtengoa, 20garrena, Azeri Bila lasterketak; eta ospatzeko, ibilbide berria estreinatuko dute. Datorren larunbatean izango da, arratsaldeko 18:30etan hasita, Urbieta kalean; haur eta gazteen lasterketak ordubete lehenago hasiko dira.
Ez da aldatuko irteera eta helmuga gunea, baina bai osatuko duten bidea: «ibilbide motzagoa eta urbanoagoa izango da, eta giro haundiagoa sortuko da, herriko Kaxkotik eta irteera gunetik askotan pasatzen delako», azaldu dute. Kaxkotik Floridara jaitsi beharrean, Urbieta kalera bueltatuko dira, Latsunbe eta Ave Maria parkean barrena ibili eta helmugara igotzeko berriro. Zehazki, 4 kilometroko buelta izango da, eta bi buelta emango dizkiote, guztira 8 kilometro egiteko.
Lasterketa nagusian, 16 urtetik gorakoek hartu dezakete parte, eta bakarka ez ezik, lau kideko taldetan ere parte ahal izango dute hernaniarrek.
Izenemateak zabalik daude, www.kirolprobak.com webgunean: txip horia dutenek 9 euro, ez dutenek 11 euro, eta taldeka apuntatuz gero, kide bakoitzeko 8 euro. Egunean bertan ere izango da aukera, 16 euroan.
Haur eta gazteek sei lasterketa, mailaren arabera
Helduen aurretik, haur eta gazteak arituko dira korrika. Arratsaldeko 17:30etan hasi, eta sei lasterketa izango dira guztira, kategoriaren arabera banatuta; hamar minuturo abiatuko dira: Haur Hezkuntzakoak aurrena, 100 metroko ibilbidean; Lehen Hezkuntzako 1-2 mailetakoak gero, 300 metrotan; Lehen Hezkuntza 3-4koak segidan, 600 metro egiteko; LH 5-6 mailetakoak, 1,2 km egiteko; DBH 1-2 mailetakoak ondoren, 2 kilometro osatzeko; eta azkenik, helduekin batera aterako dira 3-4 mailetakoak, Azeri Bilaren buelta bat egiteko (4 km).
Lasterketa horietan parte hartzea doakoa da, baina izena eman behar da: atletismo pistaren ondoko bulegoan, astelehenetik ostiralera (18:30-20:00); edo egunean bertan irteeran.