Hernanik gaur jokatuko du, 22:00etan, Azkoitiko Gurean Herriarteko txapelketaren final laurdenetako itzulerako partidua. Helburua finalerdietara pasatzea da, baina horretarako joaneko 2-1 markagailuari eta bost tantoko desabantailari buelta eman behar diote Hernaniko pelotariek. Badakite zaila izango dela, baina aukerak mantentzen dira eta ilusio betez eta moralez gainezka doaz Azkoitira.
Horretarako kadete edo jubeniletan irabazi beharra dago eta nagusiek errematatu beharko dute markagailu on batekin. Josu Oiaga entrenatzaileak aldaketa bat egingo du nagusietan. Pablo Ojuelek Ioritz Arrieta ordezkatuko du aurreko koadroetan. Kadete eta jubeniletan bikote berdinak ariko dira: Unax Huitzi-Mikel Lasa eta Xabier Salaberria-Ekaitz Insausti.
Gomazko paletan, finalerdiak Donostian etzi
Bestetik, gomazko paletan, Hernanik Loiola auzoan jokatuko ditu etzi, 11:00etan, finalerdietako joaneko hiru partiduak. Donostiarrak dira faborito nagusiak.