Ikasturte bukaerako jaialdia egingo du Elizatxo ikastolak larunbatean, eta sorpresaz beteta egongo da eguna: omenaldiak batetik, eta eskolako kantuaren estreinaldia, bestetik.
Hiru lagun, gogoan
Jaialdia goizeko 10:30etan hasiko da, Mila Kolore izena jarri dioten ikasleen emanaldiarekin. Gero, 12:00etan, Tik Klak pailazoen emanaldia izango da, eta ondoren, pintxo-potea, bazkariaren aurretik.
Goizeko emanaldi horretan, hain zuzen, gogoan izango dituzte eskolarekin lotura izan duten hiru lagun: Fernando Ederra eta Marijo Peña irakasleak, eta bertako guraso zen Mikel Valdivia, Txapete. «Ekitaldi xumea, baina bihotzez egindakoa» izango dela azaldu dute.
Goizeko emanaldien ondoren, eta behin bazkalduta, toka txapelketa, puzgarriak, tailerrak, merienda... izango dira.
Legorburu eta Solano,
kantu egile
Bestalde, larunbatean izango da beste sorpresa bat ere: Elizatxo ikastolak kantua estreinatuko du, eskolako hainbat gurasok egina: Mundu bat Elizatxon.
Iñigo Legorburuk jarri ditu hitzak, eta Kistiñe eta Xabier Solanok, musika. Kantuzeko eta eskolako irakasle, zuzendaritza eta ikasleek eman diote forma proiektuari.
MUNDU BAT ELIZATXON
Tren-geltoki ondoan
hasten den bidaian
ortzadar koloreko
margoen usaian.
Bizi-poza sendotuz
nerabe garaian
zure mundutik denok
munduratu nahian.Bizitzan jasotako
kolpe eta muxu
Elizatxo gurekin
bizitu dituzu.
Gure bizitzetako
lekutxo bat duzu
guk egin zaitut ta
zuk egin gaituzu.Etorkizun iturri, hori da garena
ttanttaka egiten den ikastolarena
Elizatxo eskola da,
Leokako urarena
beti berdina izanik,
ta berritzen dena (bis).