Gutxi geratzen da San Joan jaiak hasteko, eta prestaketa lanak hasiak dira. Festen hasiera eta bukaera udaletxeko balkoitik ikusteko eskaerak egiteko epea ere ireki da. Zozketa egingo da gero.
Izena, HHZn
Eskaerak ekainaren 16ra arte egin daitezke, udaletexeko Herritarren Harreta Zerbitzuan, 08:00etatik 19:00etara. Horretarako, eskaera orria (ikusi, www.kronika.eus) bete behar da.
Balkoira igotzeko eskaera egin dezaketenak dira, Hernanin erroldatuta dauden 18 urtetik gorako guztiak. Denera, lau lagunentzako izango da tokia, bai jaien hasieran, eta baita bukaeran ere; guztira, zortzi. Hala ere, bakoitzak lagun bat gonbidatu ahal izango du, ume zein heldu.
Erabakia, zozketa bidez
Izena ematen dutenen artean, zozketa bidez erabakiko da zein lau lagun igoko diren udaletxeko balkoira jaien hasieran, eta zein beste lau lagun, jaien bukaeran.
Zozketa hori ekainaren 19an egingo da, udaletxeko pleno aretoan, 12:00etan. Bertan, parekidetasun irizpidea aintzat hartuko dela jakinarazi du Udalak.