Urumea bizi erakusketa inauguratu zuten pasa den ostiralean Kultur etxean Haritzalderen eskutik, eta ikusgai egongo da ekainaren 22ra arte. Horren bueltan, beste hainbat jarduera antolatu dituzte, baita ere. Larunbatean izango da aurrenekoa; mendi irteera egingo dute, Santiomenditik Landarbasoraino.
Goizeko 09:30etan abiatuko dira Foru Plazatik, baina aukera egongo da Santiomendiko ermitatik hasteko. Bertatik, Landarbasorainoko bidea egingo dute, Marko Sierra eta Jesus Rubio nekazaritza ingeniariek gidatuta.
Jarduerak, erakusketaren azkeneko egunera arte
Igandean ere, izango da beste ekintza bat: familientzako tailerrak. Aranzadi Zientzia Elkarteko Jesus Tapia arkeologoaren eskutik, Urumea ibaiko eta Astigarragako lehenengo biztanleak nola bizi ziren ikasiko dute. Goizeko 10:30etan izango da, hau ere, Santiomendiko ermitan.
Hitzaldi bat, jarraitzeko
Datorren asteartean izango da hurrengo zita. Piriniotako muturzalea, ekologia eta kontserbazioa hitzaldia eskainiko du EHUko Amaiur Illarretak. Arratsaldeko 19:00etan izango da, kultur etxean.