MENDI lasterketak irabazteko azkar egin behar da korri mendian gora eta behera, baina azkarra ere izan behar da ibilbidean ez galtzeko, ongi jeisteko eta biderik egokiena hartzeko. Horretaz baliatu zen Haritz Zubillaga urnietarra eta Ereñotzuko zortzigarren eta azken Mendi Lasterketa irabaztea lortu zuen.
Pedro Alzaga eta Eneko Aizagirre aurretik ziren Urdaburu gainean, baina beherakoan bide okerra hartu eta Zubillagak pasa zituen irabazteko aukerak galduz. Azkenean minutu eta hiru segundoko aldearekin irabazi zuen urnietarrak, Alzagaren aurretik, eta minutu bat eta zortzi segundo Aizagirreren aurretik.
Lasterkari guztiak azpimarratu zuten egin zuen beroa eta horri ibildeko lokatza gehitzen bazaio denborak onak ez zirela izan erakusten du erlojuak, ez behintzat pasa den urtean bezelakoak. Irabazleak ordu bete, 12 minutu eta 28 segundoko denbora egin zuen. Pasa den urtean, Ruzafak ordu bete, lau minutu eta 47 segundo. Benetan esanguratsua.
191 parte hartzaile eta 188k amaitu zuten
Nesketan Nere Amilibiak lortu zuen garaipena. Seigarren urtez irabazi du ereñotzun aiarrak eta bere kirol ibilbidean 122 lasterketa amaitu ditu lehenengo postuan. Marka (1h28:22).
Bigarren postuan Sonia Reguero iritsi zen Ereñotzuko frontoiko helmugara. Lehia estua izan zen eta minutu eta 34 segundora iritsi zen. Podiumera igo zen Ainhoa Jauregi. Hirugarren amaitu zuen bost minutu eta 34 segundora.
Lehenengo ereñotzuarrak Igor Miner eta Ana Megias izan ziren. Guztira 191 korrikalarik hartu zuten parte eta helmugara 188 iritsi ziren.