CIDADES Lixo Zero Congresso Internacional-ek 1.000 lagunetik gora hartuko ditu asteartetik ostegunera bitartean Brasilgo hiriburuan. Mundu osoko erakunde publikoetako ordezkariak, hondakinen kudeaketan adituak, ingurumen zientzilariak, ingeniariak eta enpresariak, besteak beste, batuko dira Brasilian antolatu duten topaketan.
Kongresuaren antolakuntzak Hernaniko alkate Luis Intxausperi parte hartzeko gonbita egin dio Hernaniko esperientziak bertan azaltzeko; atez ateko sistema bilketaren nondik norakoak eta lortzen diren birziklatze tasen berri emango du alkateak, baita konpostajea kudeatzeko Hernaniko Udalak dituen programak eta plangintzak ere azalduko ditu.
Brasilgo agintariak hasiberriak dira hondakinen kudeaketa jasangarriaren aldeko politikak lantzen.
Hondakinen kudeaketak ingurumenean eta munduko kliman duen eraginaz jabetuta, Zero Zaborrerantz doazen politikak aplikatzen hasteko konpromisoa hartu dute. Munduko esperientzia arrakastatsuak eta aitzindariak ezagutu eta trukatzeko asmoz, bazter guztietako ordezkariak bilduko ditu kongresuak. Hala, Amerikako Estatu Batuak, Kanada, Uruguay, Brasil, Kolonbia, Australia, Japonia, Hegoafrika, Alemania, Italia, Suedia, Herbeereak, Eslovenia eta Euskal Herriko esperientziak ezagutzeko parada izango da Brasilgo hiriburuan.
Asteartean publiko osoaren aurreko hitzaldia emango du Luis Intxauspek eta ostegunean, lantaldeetako saioetan parte hartuko du.