Musikaz blai egingo du Hernanik gaur eguerdian, Goiz Eguzki abesbatzari esker. Beste hainbatetan egin bezala, ikasturteari agur esango diote gaur Goiz Eguzki egunarekin.
Eguerdiko 12:00etan Plaza Berritik abiatuta, Kaxkoko kaleetan zehar egingo dute ibilbidea, gehien gustatzen zaizkien kantu eta doinuekin herriko txoko guztiak alaitzeko asmoz.
Hamar txokotan, geldialdia
Kale Nagusia eta Andrekalea zeharkatuko ditu, Zinkoenearaino; hain zuzen, kale horietan zehar hamar geldialdi egingo dituzte, Kaxkoko txoko estrategikotan. Parada bakoitzean, bi kantu abestuko dituzte.
Bazkaria, bukatzeko
Ondoren, bazkaria egingo dute 14:00etan, elkarte batean. Bukatzeko, bazkalostean hainbat emanaldi sorpresa izango dira, abesbatzako kide batzuen eskutik.