Erronka ikaragarriari egin beharko dio aurre Endika Barrenetxea hernaniarrak gaur arratsaldean; bakarrik jokatu beharko du, Segurola eta Agirrezabalak osatutako bikotearen kontra.
Ez da ohiko partidua, eta ez da batere erraza izango, garaipena lortzea. Gisa honetako azken partidua San Miguelek jokatu zuen, Etxabe II eta Agirrezabalaren kontra, eta bikoteak lortu zuen garaipena, 30 eta 14,
«San Miguel ikaragarrizko pelotaria bazen ere».
Gustokoa du erronka Barrenetxea IVk, eta estrategia ere argi dauka: «berebiziko garrantzia izango du sakea ondo egiteak, eta tantoak ez luzatzeak. Asko borrokatuz gero, bikoteak fisikoki gainditu egiten zaitu, frontoia haundia baita, bakarrik aritzeko». Dena den, presioa bikoteak izango duela dio: «irabaztea obligazio da, haientzat».
Herenegun, irabazi
Ostegunean garaipena lortuta iritsiko da, gainera, Barrenetxea IV, gaurko partidura. Matxin IIIrekin, 39 eta 40 irabazi zuen Ezkurra eta Ionen kontra, eta hain zuzen, irabazi zuen sakean asmatuta.
Estelarrean ariko da Barrenetxea, baina 16:00etatik aurrera beste hiru partidu ere izango dira: Eloy-Martirena/ Aldabe-Arruarte; Matxin III-Zubiri/Segurola-Endika; eta Beñat-Garces/Etxarri-Labaka.