Asteazkenean egin zuen maiatzeko ohiko plenoa, Astigarragako Udalak; eta nobedade batekin hasi zuten, puntu bat gehitzea onartu baitzuten: Gazte Asanbladaren txosnaren inguruko mozioa, EH Bilduk aurkeztutakoa. Plenoaren bukaeran landu zuten hori, eta bertan, eskatzen zen txosna aurten toki berean uztea, eta prozesu partehartzailea abiatzea, erabakitzeko txosna gunea nolakoa izan behar den.
Plenoaren aurreko batzordean, PSE-EEren babesa lortu zuen EH Bilduk, eta beraz, onartu egin zen mozioa, EAJren abstentzioarekin, «prozesu hori dagoeneko martxan dagoelako, eta horretan lanean ari den zinegotziarekiko elkartasunez», azaldu zuen Zorione Etxezarraga alkateak. Hortaz, mantendu egingo da txosnaren kokalekua, Tomas Alba kalean.
Gure Esku Dagoren mozioa onartuta, gehiengo sinplez
Plenoko azkeneko puntua izan zen txosnaren inguruko mozioa, eta hasi ere, beste mozio batekin hasi zuten bilkura. Gure Esku Dagok hala eskatuta, hasieran irakurri eta bozkatu zen beraiena. Udalari eskatzen zioten, GEDren aldarriarekin bat egin, antolatutako ekimenetan parte hartu, eta anima zitzala herritarrak ekainaren 10eko Giza Katera. Abstenitu egin zen EAJ, «nahiz eta bakarka eta pertsonalki ados egon», azaldu zuen alkateak. Abstentzio horrengatik harridura erakutsi, eta aldeko botoa eman zuen EH Bilduk; kontrakoa, berriz, PSE-EEk. Beraz, gehiengo sinplez onartu zen mozioa.
Horren ondoren, onartu zuten Garbitaniatik ateratzeko proposamena, EAJ eta PSE-EEren aldeko botoekin; kontra azaldu zen EH Bildu.
Hiru kreditu txertaketa
Onartu zuten, baita ere, hiru kreditu txertaketa egitea; 2017 urteko gerakinaren erabileran modifikazioak egitea, alegia: Sagardun Partzuergoaren partida 45.000 euro haunditzea, Emarri taldearentzako 1.000 euro jasotzea, eta Zarkumendegiko aldagelak berritzeko 30.000 euro gordetzea.
Andoni Gartziak, EH Bilduko bozeramaileak, azaldu zuen beraiek aurkeztutako alegazioetatik, «gauza garrantzitsuak» jaso zirela, baina «giltzarriak» kanpoan utzi zirela, DBHrena eta Haurreskolarena. DBHren kasuan, alkateak azaldu zuen, hilerri ondoko lurrak erosteko asmoa daukatela, azkenean bideragarria bada, lehenbailehen uzteko lurrak Eusko Jaurlaritzaren esku, eraikina egiten hasteko. Azkenean, puntuz puntu bozkatu zen: aho batez onartu ziren txertaketak, baina baztertutako alegazioetan, kontra azaldu zen EH Bildu.
Segidan, aho batez onartu zuten, berdintasuneko dirulaguntza partida 1.000 euro gutxitu, eta Emarriri bideratzea.
Eta aho batez onartu zen, baita ere, ikastolaren haundipenerako Astigarragako Plan Orokorraren aldaketa. Gartziak azaldu zuen, «zalantza asko» dauzkatela, eta espero dutela prozedura ondo bukatzea, bestela «arazo potolo bat» izango dutelako. Eta gehitu zuen, arkitektoak zioela, zeuden alternatiben artean okerrena zela. Etxezarragak argitu zuen, hori aukeratu zutela, partzela gutxien estutzen duena delako.
Radarrak izeneko fitxategia sortzea ere onartu zen, baina EAJ eta PSE-EEren botoekin; kontra azaldu zen EH Bildu, uste duelako radar herrian mugikorrak jarri baino lehen, neurri eraginkorragoak badaudela, badenak jartzea adibidez.
Aldiz, aho batez onartu zuten, udal eraikinen garbiketa kontratua urtebetez luzatzea, Uni2 enpresarekin.
Kultur etxe berriaren proiektua, aho batez
Eta aho batez onartu zuten, ondoren, kultur etxe berriaren proiektua ere. «Baiezko kritikoa» emango zutela azaldu zuen Gartziak: «partehartzearen aldetik, eragileekin bakarrik egin dira bilera pare bat, eta kultura teknikariak soilik hartu du parte, gainerakoek bukaeran bakarrik jakin dute. Baina EH Bilduk herritarrekin egindako hausnarketaren ondoren, egindako ekarpenen %70 jaso dira, eta beraz, askoz ere balorazio positiboagoa egiten dugu». Alkateak azaldu zuen, «etengabeko aberaste prozesua» izan dela, eta saiatu direla «etorkizunean izan daitezkeen beharrei aurre egiteko proiektu egokiena osatzen».
Urumeako ibai-parkea, ‘Andre gobaragileen parkea’
Urumea ibaiaren ondoko parkeari, zein izen jarri ere adostu zuten, aho batez: Andre gobaragileen parkea izango da.
Eta ondoren, Astigarragako Udalaren ohorezko izendapenen araudia aldatzea onartu zuten, EH Bilduk aurkeztutako alegazio batzuk onartu eta beste batzuk baztertuta. «Herritarren partehartzea bermatzea zen gure helburu nagusia, eta horren inguruko alegazioak onartu dira; beraz, alde bozkatuko dugu», azaldu zuen Andoni Gartziak. Aho batez onartu zen aldaketa.
Eta bukatzeko, EH Bilduren bi mozioak landu zituzten. Aurrenekoan, azaldu zuen mendekotasun prestazioen murrizketek 40 familia astigartar kaltetu dituztela, eta eskatu zuen beraien egoeraren berri eman eta laguntzea. Aho batez onartu ziren bi puntu, baina beste bi, murrizketa hitza zeukatenak, atzera bota zituzten EAJk eta PSE-EEk, «murrizketarik ez dagoelako». Gartziak erantzun zien: «esaiezue 40 familia horiei, ez dutela murrizketarik jaso».
Eta bigarrena, Transfobia, Lesbofobia eta Homofobiaren Aurkako Egunaren inguruko mozioa izan zen, eskatuz LGTBI+ pertsonen kontrako indarkeriaren eta indarkeria matxistaren aurkako protokoloa lantzea; eta ekainaren 28an (Sexu Askapenerako Egunean), herritarrekin batera margotzea, frontoiaren kanpoko harmailetara igotzeko dauden bi eskaileretako koskak, LGTBI+ kolektiboaren koloreekin. Aho batez onartu zen mozioa.
Udal Gobernu Taldea Prentsa oharra
«Oposizioaren zenbait proposamen txertatu dira, gerakinaren onarpenean»
Plenoan landutako gaietako baten inguruan, gerakinaren behin betiko onarpenaren inguruan hain justu, balorazioa egin du Udal Gobernu Taldeak; eta nabarmendu du, oposizioaren zenbait proposamen txertatu dituztela: «jasotako 16 alegazioetatik hiru gauzatuko dira, besteak dagoeneko jasota daudelako aurrekontuan eta inbertsioen planean», adierazi du.
Apirilean aurkeztu zuen bere inbertsio proposamena, gerakinaren ia bost milioi euroekin; tartean, Herri Eskolako jangela txikia haunditzea, edota Kontxa Etxeberriako haurreskolaren proiektua.
Oraingo aldaketa eta txertaketekin, 10.000 euroko partida bat txertatu dute alkatetzatik, animaliak edukitzeari buruz sentsibilizazio kanpaina egiteko. Berdintasun arloko dirulaguntzak haundituko dira, 5.000 eurotik 25.000 eurora, «Harituz elkartearekin hitzarmena sinatzea ahalbidetuko duena»; eta 9.000 euro gehiago bideratuko dira Euskaraldia proiektura.
Kirolen arloan, konponketak egingo dira Zarkumendegiko aldageletan, eta sarea jarriko da Txomiñene frontoian, erramintaz jokatu ahal izateko.