Denboraldia bukatu dute Hernani Errugbi Elkarteko talde gehienek, baina oraindik ere, mugimendurik ez da faltako, errugbi giroan. Izan ere, datorren astean bi zita garrantzitsu jarri ditu elkarteak: errugbi inklusibo txapelketaren bigarren edizioa, eta garagardo azoka.
Txapelketarekin batera, zenbait ekintza antolatu dituzte, asteartean hasita. Mahai ingurua egingo dute, asteartean bertan, arratsaldeko 18:00etan Biterin, Txema Uria, Maiteder Requejo eta Jurgi Olasagastirekin. Asteazkenean, berriz, kirol sentsibilizazio saioa egingo dute, 18:00etatik 20:00etara Tilosetan, Gipuzkoan inklusioan lan egiten duten zenbait klubek jarriko dituzten postekin. Eta ostegunean, tailerra izango da Biterin, 18:00etatik 20:00etara, aniztasun funtzionalaren inguruan, Aritz Sanchezekin. Horretarako, izena eman behar da: inklusibo@hernanirugby.eus helbidera idatzi, izena eta bi abizen eta adina bidalita.
Eta txapelketa, azkenik, larunbatean jokatuko da, egun osoan zehar, zazpi talderekin.
Garagardo azoka, bere aldetik, 15garrenez jarriko du elkarteak, eta Atsegindegin egongo da, ostegunetik igandera.
Espainiako Sevens Txapelketa gaur, Valentzian
Asteburu honetan ere, badauzkate zitak hernaniarrek. Gaur, Espainiako Sevens Txapelketa jokatuko du Hernanik, Valentzian, iaz lortutako garaipena errepikatzeko asmoz.
Igor Genua, bere aldetik, Espainiako selekzioak deitu du, Londreseko Munduko Serieak jokatzeko, gaur eta bihar.