Hondakin gutxiago sortu eta hobeto kudeatzeko, makina bat proposamen

Urtero bezala, herriko kezka edo arazoren bat aztertu dute Astigarragako Herri Eskolako ikasleek, Eskola Agenda 21 egi­tasmoaren barruan. Aurten, hondakinen gaia landu dute, eta horretarako, lan ezberdi­nak egin dituzte ikasleek: Lehen Hezkuntzako 1 eta 2 maileta­ko­ek, galdeketa egin dute etxean eta inguruan, zaborra nola sail­katzen dugun ikusteko; 3 eta 4 mailetakoek, ikertu dute zein ohitura dauzkagun; eta 5 eta 6 mailetakoek, aztertu dute ka­le­ko hondakin bilketa sistema.
Bildutako material guztia­re­kin, ikasleen foroa egin zu­ten apirilaren 26an, eta bertan adostu zituzten, beraiek hartu beharreko konpromisoak, eta Udalari aurkeztuko zizkioten proposamenak. Horretarako, pleno berezia egin zuten joan den asteazkenean.

Dagoeneko hartzen diren neurri batzuk, hobetzeko
Pleno horretan, azaldu zuten, Udalak dagoeneko hartzen di­tu­en neurrietako batzuk, ho­be­tu egin behar direla: edu­ki­on­tzi batzuk zaharkituta edo puska­tuta daude, beste batzuk adi­ne­koentzat edo desgai­tasu­nen bat dutenentzat dese­go­kiak dira, badira gainezka eginda daudenak ere, eta indus­tria­gu­nean pilatu egiten da zaborra. Aipatu zuten, bestalde, orain­dik zabor gutxi murrizten dela, no­la sailkatu jakiteko ere za­lan­tza sortzen dela, ideia gutxi daudela zaborra murriztu eta berrerabiltzeko, bilketa furgo­ne­ta ez dela erabiltzen, ez dela ezagutzen garbiguneak zein aukera ematen dituen, edota askok uste dutela hondakinen ardura politikoena dela.
Ondorio horien harira, ma­ki­na bat proposamen egin ziz­ki­­eten udal ordezkariei, bi mul­­tzotan sailkatuta. Batetik, hon­dakin gutxiago sortzekoak: eli­kagai frexkoak saltzen di­tuz­ten azoka edo saltokiak susta­tzea; bilduki gutxi erabiltzen dituz­ten saltokiak sortu eta logotipo batekin identi­fi­katzea; biga­rren eskuko truke puntua sortzea; garbigunean berrera­bil­tzeko moduan dagoenaren be­rri ema­tea; eta sentsi­bili­za­zio kanpai­nak egitea, honda­ki­­nak mu­rriz­teko. Eta bestetik, honda­ki­nen kudeaketa hobe­tze­ko propo­sa­menak: eduki­on­­tzi erosoagoak jartzea, gehia­go­tan hustutzea eta zaharrak konpontzea; sail­ka­tzen dute­nei hobariak apli­ka­tzea, eta egi­ten ez dutenei aten­tzioa deitzea; sail­katze gida edo aplika­zio­ bat sortzea; eta gar­bi­gunearen eta bilketa fur­go­ne­ta­ren infor­mazioa zabaltzea.
Ikasleek, beraien aldetik, kon­­­promisoa hartu zuten, por­­taera arduratsua eta jasanga­rria izateko, hondakinekin.