Azken txanpa besterik ez da geratzen aurtengo San Joanetarako, eta udal ordezkariek dagoeneko onartu dute aurtengo festetako programa Kultura Batzordean. Orain Hernani taldeak aurkako botoa eman duela adierazi du: «koherenteak gara, eta animalienganako tratu txarrak geldiaraztea eskatzen dugu, eta hurrengoetarako, neurriak hartzea».
Urtebete, «erabakia hartzeko»
Bere botoaren nondik-norakoa azaltzeaz gain, EH Bilduren Gobernu Taldeari kritika egin dio: «urtebete izan du Gobernu Taldeak gure jaietan animaliarik ez erabiltzeko erabakia hartzeko». Baina ausardia falta zaiola salatu du: «ez da posible izan, ez dago borondaterik, beldur asko dago. Badirudi beldurra daukatela erabaki politiko bat, oso etikoa dena, hartzeko, eta beraien hautesle batzuei ez gustatzeko».
Dena den, taldeak eskua luzatzen die: «ziur gaude Gobernu Taldea eta EH Bildu ez daudela animaliekiko tratu txar, sufrimendu edo torturen alde. Erabaki politikoa da, sendotasuna eta ausardia behar duena. Eta bide horretan, dudarik gabe, Orain Hernani taldearen laguntza izango luke».
Aurrekontuaren %10a
Era berean, udal taldeak datuak ere ematen ditu: «gure festetako aurrekontuan, 10.800 euro dijoaz animalien tratu txarretara (gutxi gorabehera aurrekontuaren %10a). Horregatik esaten dugu sufrimendua ez dela doakoa, denok ordaintzen dugu». Beren ustez, sokamuturrean xahutu beharrean hobe litzateke diru hori «13-17 urte bitarteko neska-mutilen ekintzetan gastatzea».
Azkenik aipatzen du Askekintzak Gurean dokumentala eman zuela Hernanin, Euskal Herrian egiten den animalien erabilerari buruz, eta Orain Hernani besterik ez zela izan.