Correosek egindako azken lanekin «oso konforme» dagoela adierazteko prentsa-oharra helarazi du Koxka elkarteak Kronikara. Diotenez, «traba guztiak kendu dituzte edonork erraztasun guztiak izan ditzan, bulego hartara iritsi, sartu eta zerbitzatua izateko».
Aurretik ere, beste hainbat lan
Baina hori ez da Correosek burututako lan bakarra, aurretik ere eginak dauzka obra garrantzitsu batzuk, Koxka elkarteak adierazitakoaren arabera: «mostradorearen altura jaitsi eta sarrerako arranpla eder bat jarri, gurpilez ere ateraino iristeko moduan. Baina, ez zuten ate elektrikorik jarri; beraz, gurpilek bazuten iristerik, baina ez sartzerik».
Horren aurrean, Koxka elkarteak eskaria luzatu zien arduradunei, «ate elektrikoa jarri zezaten». Kaso egin diote, eta «gaur egun erraztasun guztiak daude ateraino iritsi eta sartzeko», onartu dute.
Beste entitate batzuei ere bai
Bide batez Elkarteak azaldu du, eskaera bera egin diola beste hainbat entitateri, «batik bat hainbat banketxeri»; «espero dezagun entitate horiek ere kasu egitea, denon artean traba arkitektonikorik gabeko Hernani eder bat lortu dezagun», aldarrikatu dute taldekideek bukatzeko.