Kultur etxe berria egiteko obrak martxan daude, Kontxa Etxeberria plazan, eta udal gobernu taldeak dio espero duela «erabiltzeko prest egotea 2019ko udara pasata».
Asteazkeneko plenoan azken aldaketak egitea espero du gobernu taldeak, eta bat egin du kultur teknikariak egindako proposamenarekin; Murgiazpi izena jarriko zaio «Astigarragako kultura zerbitzuak batuko dituen azpiegiturari».
«Itxaropenak beteko ditu»
Eraikin berria egiteko, udal gobernu taldeak dio «gogor negoziatu» duela promotorarekin. «Urtebetean eta gehiago egindako bileren ondoren, gobernu jeltzaleak lortu du astigartarren itxaropenekin eta aisialdi eta kultura beharrekin beteko duen kultur etxea».
Proiektua «asmoetara mugatuta geratu zen aurreko legegintzaldian», baina Udala eta promotoraren arteko hitzarmena irailean onartu zen, «EAJren konpromisoari esker».
Hori horrela, plenoan onartu zela gogorarazi du, «nahiz eta EH Bilduk aurka bozkatu», eta «10 urteren ondoren, azpiegitura estrategikoa errealitate bihurtuko» dela.