Partidu bakarra jokatuko dute asteburuan Mundarroko futbolariek, baina ez nolanahikoa; gainontzeko mailetako taldeek bukatu dute lehia, baina Lehenengo Mailako Erregionaleko taldeak Kopako finala dauka.
Gaur izango da finala, 15:30etan Orioko Mendibeltz zelaian, eta Elgoibar izango du aurkari. Aurreko asteburuan, final erdian, golik egin gabe berdinduta bukatu zen Trintxerperen kontrako partidua, baina penaltietan gola eginda, Mundarrok egin zuen aurrera. Gaur, Koparekin etxeratzeko egingo dute borroka.
Uda eta denboraldi berrira
Datorren denboraldiari begira ere lanean hasteko prest dago Mundarro. Horrela, ekainaren 3an entrenamendu saio berezia egingo da 2010ean jaiotako neska-mutilei begira, 11:00etan Zarkumendegin. Bukatzeko luntxa izango da, eta zalantzak argitzeko aukera. Haurrak eta gurasoak daude gonbidatuta.
Bestalde, uztailean 8 eta 12 urte arteko neska-mutilentzako campusa antolatu du Mundarrok bi txandetan, 09:30etatik 13:30etara. Izenematea ekainaren 10 arte egin daiteke: campusmundarro@gmail.com, astigarragakomundarrofke@g-mail.com edo 617 633 955.