Eskolako jangela txikia aztertzen izan dira maiatza hasieran Eusko Jaurlaritzak Gipuzkoan daukan Delegaritzako bi teknikari, eta Guraso Elkarteak dio «azken hilabeteetan Guraso Elkarteak behin eta berriz esan duena baieztatu» ziotela; «jangelaren haundipena behar-beharrezkoa dela, alegia».
Hori horrela, Udalari eskatu dio argitzeko, «uda honetan jangelaren haundipenari ekingo dion ala ez».
«Handipena egiteko arazorik ez»
Guraso Elkartearen esanetan, Eusko Jaurlaritzako teknikariek patio txikia ere aztertu zuten, jangelaz gain, eta «haundipena egiteko arazorik ez dagoela baieztatu eta metro nahikoak bermatuko liratekeela adierazi zuten». Beraz, «Eusko Jaurlaritzako teknikariek Guraso Elkarteari arrazoia eman» diotela nabarmendu dute, azken hilabeteetan bizitako «eztabaida, tentsio eta momentu gogorren» gainetik, eta «Guraso Elkartearen aldarria gutxietsi nahi izan duten» guztien gainetik.
«Teknikari hauek haurrak bazkaltzen ari zirela ikuskatu zuten jangela, baita gure haurrek baldintza horietan ezin dutela jarraitu adierazi ere. Haurrak mahai gainean bi eskuak jarri ezinda, esku bat mahai azpian zutela bazkaltzen ari ziren».
«Nor dabil gezurretan?»
Bestalde, Guraso Elkartea «harrituta» azaldu da, «Gipuzkoako Delegaritzan jangelaren haundipenaren inguruko inolako berririk ez dutela eta inork haundipenaren baimenaren inguruko galderarik luzatu ez duela adierazi» zietelako.
Udalera jo dute hori argitzeko, eta «hori horrela ez dela esan» diete; «alegia, Delegaritzarekin harremanetan egon direla. Orduan, nor dabil gezurretan? Udala? Delegaritza?».
«Haurren ongizatea da jokoan jarri dutena»
Gertaera hauekin haserre agertu da Guraso Elkartea, eta gauzak argitzeko eskatu du.
«Udal gobernuari eta berau sostengatzen dutenei iruzur gehiagorik egin ez diezagutela eta behingoagatik uda honeta jangelaren haundipenari ekingo dioten edo ez argitzea eskatzen diegu. Jangelaren haundipena irailerako egina ez egotea udal gobernu honen utzikeria eta egoskorkeriagatik izango da, eta gure haurren ongizatea da jokoan jarri dutena (...). Orain udal gobernuari dagokio beharrezkoak diren neurriak hartzea. Bestela, haiengan eroriko da jangelan gerta daitekeenaren ardura osoa».