Eskaera egin dio Hernaniko PSE-EEk, Udal Gobernu Taldeari, erresidenteentzako aparkalekuak Karabel auzora zabaltzeko: «bizilagun askok azaleratu digute, auzoan aparkatzeko daukaten arazo larria. Eta Hernaniko erdigunean ezarriko den aparkaleku sistema berria aprobetxatuz, Udal Gobernu Taldeari eskatzen diogu zonaldea Karabel auzora zabaldu dezala», azaldu du Ricardo Crespok, Hernaniko sozialisten bozeramaileak.
Era berean, jakinarazi du, aparkalekuei buruzko hausnarketa prozesuan parte hartu zutenean, adierazi zutela, zenbait auzo elkartek bezala, «arazoa auzoetan ere badagoela, bereziki erdigunetik gertu daudenetan; eta beraz, soluzioak ezin zirela soilik erdigunean zentratu».
Karabelen kasuan, zehazki, eskatu dute erresidenteentzako izatea auzora sartzeko kalearen barruko aparkalekua, eta Olaeta plaza; «eta beharbada, pibote batekin erregulatua, Atzietan bezala». Aldiz, Zubipe ondoko aparkalekuak, librea izaten jarraitu behar duela uste dute, baina pibote batekin erregulatu behar dela.
«Hernaniko aparkaleku ohikoa bilakatu da Karabel»
PSE-EEk azaldu du, gainera, «Hernaniko ohiko aparkaleku» bilakatu dela Karabel: «astean zehar, Donostiara joateko Renfe hartu edo Kaxkora igogailutik joaten direnek, bertan uzten dute kotxea. Txotx garaian, larriagoa da arazoa, eta bertako bizilagunek ez dute aparkalekurik aurkitzen, desesperatuz».
Zikuñagan ere, antzeko neurriak hartu behar direla uste du PSE-EEk: «inguruko enpresetako kotxeek betetzen dute aparkalekua, eta bizilagunek aparkatzea zaildu».