Hernaniko Hezkuntza Plataformak festa eguna du gaurkoa, eta herritar guztiak gonbidatu ditu, Aniztasunean elkarrekin lelopean, parte hartzera. Pregoia Gudarien plazan botako dute, 10:45etan, eta hainbat ekitaldi izango dira gero, hiru gunetan.
Tilos, Plaza eta Atsegindegi
Hiru gune antolatu dituzte. Plazakoa Murrizketak vs. kalitatezko hezkuntza izango da; Tilosetakoa, Aniztasun gunea; eta Atsegindegikoa, Hezkuntza=esperimentatuz ikasi.
Plazan, pregoia botata, ezagutza ibilbidearen mahaia, murala eta liburutegia egongo dira, eta 11:00etan Kanikarekin jolasak egingo dira. Tilosetan, berriz, Amherrekin henna eta trentza tailerra, eta Pausokarekin jolasak. Eta Atsegindegin, eraikuntza jolasa, serigrafia tailerra (kamixeta eraman behar da), papiroflexia, behatz txotxongiloak eta brotxe tailerra.