Plazan elkartu beharko dute, 16:30etan, Gazte Olinpiadetako partaideek, probarekin 17:00etan hasteko.
Bi proba egingo dira: ginkana, eta barru. Ginkanarako, talde bakoitzak ume txikientzako motoa beharko du.
Txanponak, barrura
Ginkana egingo da aurrena. Sei gune egongo dira, herrian zehar. Plazan hasiko da, eta talde bakoitzeko jokalari batek txanpon bat edalontzi batean sartzen asmatu beharko du. Behin hori lortuta, ume txikien motoarekin Plaza Berrira jaitsi beharko du.
Han, hurrengo taldekideak txupito edalontzian sartu beharko du txanpona, belaunekin helduta, eta korrika joango da Conde kioskora (Atsegindegi-taxi geltokiaren artean). Bi taldekide egongo dira bertan, hankak lotuta, eta horrela joan beharko dute, Txirrita kalean zehar, Zinkoenea aldera, laugarren erreleboa ematera. Izpizua kalean lau kandadu egongo dira, eta pasahitzak topatu beharko dira; helburua, sua egiteko tresna lortzea.
Tresna horrekin, Plaza Berrin zain dagoen taldekideak sua egin beharko du, eta ordura arte parte hartu duten taldekideekin Plazara igo. Han asmakizuna asmatuta bukatuko da jolasa.
Bukatzeko, barru
Azken proba, Tilosetako frontoian egingo da: barru. Talde bakoitzeko neska eta mutil banak hartuko dute parte.