Aurreneko fasea, proposamenak egitekoa bukatu da, Hernani Erabaki parte-hartze prozesuan. Aurtengoan 376 proposamen jaso dira, 2019ko udal aurrekontuko 500.000 eurorekin egin daitekeenaren inguruan; iaz, 533 izan ziren.
Gehienak postontzietan (144) eta internet bidez (122) jaso dira, eta auzoz auzokako bileretan 68, Eskola Agenda 21 programaren bidez 19, batzordeen bidez 15 eta iazko prozesutik berreskuratutakoak beste 8 jaso dira.
Maiatzaren 28ko astetik ekainaren 10era bitartean egingo da bigarren fasea; proposamenak lehenetsi eta aurrera zeintzuk egingo duten erabakitzekoa.
Zerbitzu eta hirigintzakoak, gehienak
Proposamen gutxiago jaso izanaren arrazoiak bi izan daitezkeela aipatu zuen Aztikerreko teknikariak, osteguneko aurkezpenean. Batetik, norbanako bakoitzak egin ditzakeen proposamen kopurua hamarrera mugatu izana, eta bestetik, proposamen bakoitzaren gehienezko aurrekontua 125.000 eurora mugatzea. Era berean, urtero egiten diren proposamen batzuk, baina Udalaren konpetentziakoak ez direlako baztertzen direnak, ez dira errepikatu, besteetan bezainbeste.
Gaiei erreparatzen bazaie, ordea, aurreko urteetan bezala, zerbitzuekin eta hirigintzari lotutako proposamenak egin dira batez ere, eta mugikortasunarekin lotutakoak gero: aparkaleku gehiago jartzea; parke eta plazak egokitzea; bide-segurtasuna hobetzea; zabor eta hondakinekin lotutakoak; txakur parkeen ingurukoak...
Gutxiago jaso dira kultura, hezkuntza edota euskeraren inguruan.
Lehenestea, bileretan
Behin proposamenak bilduta, aurrera zeintzuk egingo duten erabakiko da, hurrengo fasean. Irizpide batzuk zehaztu, eta horien arabera baloratuko dira, aurrez aurreko bileretan. Datak zehaztean emango dute fase honen berri zehatzagoa.