Erronka bota die Isabel Otero Gloriek, astigartarrei eta inguruko herritarrei. «Matazak indarkeria sexistaren aurka proiektua hemen, Astigarragan sortua da, duela 4 urte. Gurea da, euskalduna eta zabaltzen ari gara. Ez ote gara gai, euskaldunok egindakoa bultzatzeko?».
Proiektuaren nondik-norakoak bilduko dituen dokumentalaz ari da: 365 sororitate hari. Hura grabatzeko behar den dirua biltzeko crowdfunding kanpaina jarri dute martxan, eta hilabetea bukatzerako, 9.000 euro bildu behar dituzte, gutxienez; 2.700 euro bildu dituzten, orain arte.
4.000 metrotik gorakobufanda, biolentzia sexistaren aurka
Harituz elkarteak 2014an hasitako proiektua da Matazak, elkarteko lehendakariak, Isabel Otero Gloriek azaldu bezala. Ideia zen, Azaroaren 25era, Emakumeenganako Indarkeriaren Aurkako Egunera begira, sentsibilizaziorako bufanda bat jostea, 30 zentimetroko zabalerakoa, eta nahi adina luzeerakoa. Urte hartan, 1.500 metroko bufanda lortu zuten.
Lau urte geroago, bizirik jarraitzen du proiektuak. «Dagoeneko, 4.800 metro dauzkagu josita. Horrek ikusgarritasuna ematen digu, baina hori baino garrantzitsuagoa da zabaltzen ari garen mezua: biolentzia sexistak bizirik jarraitzen du, eta hainbat emakumeren memoriak josita daude mataza horretan».
Santu izateko, herriz aldatu behar
Bufanda erraldoi horrek biltzen dituen istorio eta bizipenak, ordea, ez dira Astigarragako edo Euskal Herriko emakumeenak, bakarrik. «Estatu osoan barrena gabiltza, eta baita estatutik kanpo ere». Cordoba, Valentzia edo Alacanten izan dira. Asturiasko Askatasunerako Treneko Emakumeek ere bat egin dute Matazekin. Eta Madrilgo hainbat erkidegok; azaroan Mostolesen izango dira. Nafarroan ere izan dira. Eta iaz, adibidez, Tunezko emakumeak izan ziren Astigarragan, Azaroaren 25ean, eta datorren ekainean, Suediara joango dira Harituzeko hiru kide.
«Baina bada esaera bat, esaten duena: santu izateko, herriz aldatu behar. Badirudi ez daukagula etxean, etxetik kanpo daukagun sororitate adina. Horregatik egin nahi dugu dokumentala. Astigarraga, gure lurraldea, Euskal Herria bultzatzeko. Adierazteko gurea dela proiektua».
Internet bidez bakarrik ez, eskura ere eman daiteke laguntza, Gerizpen, Isa janari-dendan eta Ogi Berrin jarri diren kutxetan: lazoa, borondatearen truke.
‘365 sororitate hari’ grabatzeko, laguntza bila
Dokumentala egiteko proiektua, beraz, martxan jarri dute, dagoeneko. «365 sororitate hari izena du. Izan ere, emakume asko eta oso desberdinak gara sarea, bufanda josten ari garenak, eta ahizpak, feminismoari esker, sororitateak edo ahizpatasunak batzen baikaitu, biolentzia sexistaren aurkako borrokan».
Eneko Olasagasti izango da dokumentalaren zuzendaria. «Enekok genero ikuspegia barneratua dauka. Alardearen seme-alabak (2013) zuzendu zuen, eta asko gustatzen zaigu bere ikuspegia. Iruditzen zaigu dokumental batek mezua zabaltzen lagunduko digula; zinema jaialdietan ere aurkeztu ahal izango dugula».
Hori ordea, garestia da, eta crowdfunding kanpaina jarri dute martxan, behar den dirua biltzeko. Lagundu nahi duenak www.goteo.org/project/365-hilos-de-sororidad webgunean sartu behar du, eta ekarpena egin. Guztira, 20.000 euro inguru beharko dituzte, baina biltzen segi ahal izateko, gutxienez, 9.000 euro lortu behar dituzte maiatza bukatzerako, eta 2.700 inguru lortu dituzte orain arte. «Enpresaz enpresa, inguruko herrietako udaletxeetara... egin ditugu bisitak. Lagunduz gero, dokumentalean agertuko da erakunde horren publizitatea, eta desgrabatu ere egingo du!», dio Isak, animatzeko.
Era berean, eskura laguntzeko ere badago aukera. «Lazoak josten ditugu, eta Isa janari-dendan, Gerizpen eta Ogi Berrin utzi ditugu. Borondatearen truke hartu ditzake, nahi duenak, eta proiektu honekin bat egin». Informazio gehiago nahi duenari ere, bideak eman dizkiote: 630 678 474 telefonoa edo Madejas contra la violencia sexista Facebook orrialdea.
Donostiako Olatu Talka eta Suedia, agendan hurrenak
Matazak proiektuarekin bat egin duten hainbat emakumeren istorioak kontatuko dira dokumentalean, eta besteak beste, biolentzia sexistaren kontrako borrokan urtebetean egiten dituzten ekintzen kontakizuna ere egingo da.
Lau urte martxan daramazkien proiektu honek ez du etenik, eta hainbat zita ere badauzkate, laster: «Bihar Ilar Egunean izango gara. Eta Donostiako Olatu Talkan, Zuloaga plazan; hilaren 26an, 11:00etatik 14:00etara josten, eta ikusgarritasuna ematen, eta 27an, 13:30etan, performance batean. Gero Suedian, Sagar Uztan, Ondareari buruz Pasaian egingo diren Europako Jardunaldietan... Jendeak kontzientzia hartu dezala, arazo potolo baten aurrean gaudela; genero indarkeria».