Pixkanaka herrian errotzen ari den lasterketa da Goizutrail mendi lasterketa. Gaur izango da zita, goizeko 09:00etan abiatuko dira korrikalariak Goizuetako plazatik.
Bi ibilbide, aurten ere
Bosgarren Goizutraila izanen da aurtengoa. Ibilbide batekin hasi zen, bigarrena gehitu zitzaion bigarren urtean, eta horri eutsiko diote aurten ere. Bi ibilbide izanen dira aukeran, beste behin: motza, 10 kilometrokoa; eta luzea, 25 kilometrokoa. Biak herriko plazatik abiatuko dira, handik Aitasemegi auzora igoko dira, Eneko Elorriraino (680 m), eta herrira bueltan jaitsiko dira. Han izanen dute helmuga ibilbide motza aukeratzen dutenek. Besteek, ordea, jarraitu eginen dute Alainzuriain auzotik. Mandoegira (1.045 m) igoko dira hortik, eta gero, arbasoen aztarnei segika jaisteko Goizuetara, harrespilen artetik.
07:30etatik aurrera jaso ahal izanen dira dortsalak.
Egunean bertan ere, izena emateko aukera
Dagoeneko ehundik gora korrikalarik eman dute izena www.herrikrosa.eus web orritik. Horiek, gaur 07:30etatik aurrera jaso ahal izanen dute dortsala; bertan, azken momentuko izenemateak ere eginen dira; bakarrik ibilbide luzerako, izan ere, motzeko dortsalak bukatu egin dira.