Joseph Stiglitzi harrera ofiziala egin diote gaur goizean foru Jauregian Gipuzkoako diputatu nagusi den Markel Olanok eta Ekonomisten Euskal Elkargoko presidente den Iñaki Ruizek. Ondoren, lan bilera egin dute, eta bertan, Foru arduradunak Etorkizuna Eraikiz programa aurkeztu dio, denon artean biharko lurraldea eraikitzeko erreminta dena. Stiglitzek interes haundiz jaso du ekimenaren berri, eta etorkizuneko erronka eta desafioei aurre egiteko egin dezakeen ekarpena nabarmendu du.
Donostiara, bisitan
Ekonomiako Nobel sariaren irabazlea Donostian da egunotan, Gipuzkoa Talk (G-Talk) konferentzia-zikloan parte hartzeko. Topaketa-sorta Gipuzkoako Foru Aldundiak eta Ekonomisten Euskal Elkargoak antolatu dute, elkarlanean. Testuinguru honetan, Garapena, desberdintasuna eta demagogia XXI. mendean izenburupean, hitzaldia eskaini du gaur 19.00etan Stiglitzek Kursaalean, 700 lagunen aurrean. G-Talk hitzaldi zikloaren parte izateaz gain, ekitaldia Ekonomisten Euskal Elkargoak urtero antolatzen duen Ekonomisten Foroaren parte ere bada.
Harrera jendetsua, Gipuzkoan
Gaur goizeko bileran, Olano eta Ruizez gain, parte hartu dute Ekonomia Sustapen, Landa Ingurune eta Lurralde Orekako foru diputatu den Ainhoa Aizpuru; Ogasun eta Finantzetako foru diputatu den Jabier Larrañaga; eta Gipuzkoako Ekonomisten Euskal Elkargoko arduradun den Maite Villafruelak. Gipuzkoako ehun ekonomikoaren eta enpresa ereduaren ezaugarriak aurkeztu dizkiete foru arduradunek Stiglitzi: industriaren pisua, ETE kopuru altua, berrikuntzaren aldeko apustua, ekonomia soziala… Gainera, Gipuzkoak eta euskal lurraldeek duten zerga eta finantza sistema berezia aurkeztu diete eta, hemen, autogobernua ahalbidetzen duen eta arrakastako gakoetako bat den Kontzertu Ekonomikoari buruzko xehetasunak azaldu dizkiete. Diputatu nagusiak esan duenez, «susperraldi eta krisialdia gainditzeko puntuan dago Gipuzkoa, baina “triunfalismoetatik urrun mantendu behar dugu». «Epe motzetik begirada altxatu eta epe ertain eta luzean izango ditugun erronkei aurre egiteko prestatzeko garaia da», gehitu du.
Etorkizuna Eraikiz programa, aurkeztua
Horretarako martxan jarri den Etorkizuna Eraikiz programa aurkeztu dio ondoren Olanok Stiglitzi. Aldundiak bultzatzen duen proiektu honen bitartez, eta esperimentazio aktiboa erabiliz, gaurtik biharko Gipuzkoa eraiki nahi da. «Zer egiten dugun bezain garrantzitsua da egiten duguna nola egiten dugun eta, horregatik, Etorkizuna Eraikizek irekia eta elkarlanekoa den gobernantza eredua darabil, guztioi eragiten digun erronka honi erantzuteko ahaleginean herritarrak eta gizarte antolatua ere inplikatuz», esan du.
Honela, zibersegurtasuna, zahartze osasuntsua edota elektromugikortasuna bezalako alorretan Aldundia bultzatzen ari den lana ezagutu du Stiglitzek. Oso interesgarriak direla iritzi dio, lurraldearen transformazioan lagundu eta etorkizunean ere lehiakorrak izaten jarraitzeko erreminta baliagarriak direlakoan.