Aurten ere antolatu dute egitarau berezia, Portu auzoan, udaberrirako. Hiru ekintzarekin osatutako kultur programa prestatu dute, eta etzi, emango diote hasiera, ostiralarekin.
Aurrenekoa, auzoan bertan egingo dute: cavaren enologia ikastaroa izango da, Guillermo Castaños enologoaren eskutik, Portuko Auzo Elkartearen lokalean. Ostiralean izango da, arratsaldeko 19:30etan hasita; baina bertan egon eta parte hartu nahi duenak, orain dauka izena eman beharra. Izan ere, plaza kopurua mugatua da, eta Pedro Mari tabernan apuntatu behar da.
Bohedal bodegara bisita, maiatzaren 26an
Udaberriko programaren bigarren zita, berriz, datorren astean jarri dute. Maiatzaren 26an izango da, larunbatarekin; eta edarien bueltan jarraituko dute, baina cavak beharrean, ardoak hartuko du protagonismoa. Bohedal bodegara joango dira, bisitan; Errioxako Cuzcurrita del Río Tirón herrira, hain justu.
Eta klasiko batekin bukatuko dute, prestatu duten egitaraua. Izarrei begira jarriko dira ekainaren 1ean, ostiralarekin: behaketa astronomikoa egingo dute, 21:00etan hasita, Aranzadiko kideen eskutik.
Eguraldiaren menpe egongo da ekintza hori, hala ere: eguraldi txarra eginez gero bertan behera geldituko da behaketa astronomikoa.