Bazekiten hernaniarrek, kanporaketa zaila zeukatela igandean, Berria Txapelketako final zortzirenetan. Eta hala izan zen: kadete eta jubenil mailako partiduak irabazita, nagusi izan zen Zeanuriko Joko Alai taldea (1-2).
Kadete mailako partiduan, Erkiaga II eta Emaldi bizkaitarrak gehiago izan ziren, Uitzi eta Oiartzabalen kontra (8-22), aurreneko partiduan. Eta bigarrena izan zen klabea, jubenil mailakoa. Xabier Salaberriak eta Ekaitz Insaustik jokatu zuten, Urigoitia eta Erkiagaren kontra; eta Zeanuriko bikotea faborito izanda ere, oso estu hartu zituzten hernaniarrek. 13-16 izan ziren atzetik markagailuan, ia bukaeraraino irabazteko aukera mantenduz; baina Erkiagak bere maila erakutsi zuen azkenean, eta 14-22 nagusitu ziren.
Bigarren puntu horrekin, final laurdenetara pasea ziurtatu zuten bizkaitarrek. Beraz, ez zegoen ezer jokoan, nagusien partiduan; baina behintzat, puntu bat lortu zuten Paul Ojuelek eta Eneko Aizpitartek, 22-11 irabazita, Zeanuriko Mendia eta Beobideri.
Herriartekoa, igandean
«Galduta ere, prestaketa ona izango da Herriartekorako», zioen Rufino Rekaldek, taldeko arduradunak, kanporaketaren aurretik. Eta hain justu, horri begira jarriko dira orain: igandean hasiko dute Herriarteko Txapelketa, Altzoren kontra, final zortzirenetan. Goizeko 11:00etan izango da, Altzon.
Rekaldek aurreratu zuenez, Unax Uitzi eta Mikel Lasa ariko dira kadeteetan; Xabier Salaberria eta Ekaitz Insausti jubeniletan; eta nagusietan, bosten artean bi: Ioritz Arrieta, Ojuel, Aitor Gorrotxategi, Markel Lizeaga eta Aizpitarte.