Bosgarrenez egingo dute aurten, Hernanin, Lore eta Landare Azoka berezia. Larunbatean izango da, Urbieta kalean; goizeko 10:00etan hasi, eta eguerdiko 14:30ak arte.
Helburua da, «lore eta landare dendak kalera atera, beste espazio bat hartu, eta bezeroekin harreman zuzena izatea». Hala jakinarazi zuten atzo, azokaren aurkezpenean, Luis Intxauspe alkateak, Gurutze Amigorena turismo teknikariak, Ainhoa Amundarain Behemendiko ordezkariak eta deKoloreko Juantxo Pollacinok.
16 postu, mota guztietako lore eta landareekin
Guztira, 16 postu jarriko dituzte azokan, Euskal Herri osotik etorritako saltzaile eta artisauekin: Hernaniko Karabeleko eta Mendilore, Astigarragako Loraldi, Lasarteko Semillas Ecológicas, Donostiako Lore Prentsatua, Usurbilgo Urtinea, eta Oiartzungo Zunoyar Lorategia eta Islaya, Gipuzkoatik; Nafarroatik etorriko dira Viveros el Montañés, Aritzkurengo Tienduka, Flores Ganchillo, Sojo Natura eta Alfareria Naharro; eta Bizkaiatik, Ortuberri, Oiaralda eta Tissus Artisautza.
Lore eta landare postuak izango dira gehienak: landare aromatikoak, kaktusak, garaikoak, barrurako zein kanporako lore eta landareak... Baina izango dira bestelako postuak ere: lore prentsatuarekin egindako koadroak, kosmetika naturala, buztinez egindako lorontziak eta irudiak, lore lehorrekin egindako pitxiak...
Postuez gain, bi tailer ere egingo dituzte haurrentzat, Urbieta kalean bertan. Batetik, lore prentsatuarekin orri-markatzaileak egingo dituzte; eta bestetik, egurrarekin ere ariko dira lanean, eskulanak egiten. Goizeko 11:30ak aldera hasiko dira biak.
Amundarainek nabarmendu zuen, «garrantzitsua» dela lore eta landare saltzaileek «horrelako plaza bat izatea», eta Pollacinok ezinbestekotzat jo zuen, azoka bereziak antolatzen jarraitzea. Intxauspek, azkenik, azoka hau antolatzen egiten duten lana eskertu zien Behemendiri eta deKoloreri; eta herritarrak animatu zituen, azokara gerturatzera.